‘हामी छौं’ सिजन १० को ट्रेलरमा हिंसा पीडितको कथा

सलोन सलिना फिल्सस्को प्रस्तुतीमा बनेको डकुड्रामा ‘हामी छौं ‘सिजन १०’ को ट्रेलर सार्वजनिक भएको छ। सार्वजनिक ट्रेलरमा वास्तविक जीवनमा घरेलु हिंसादेखि यौनिक हिंसाबाट पीडित भएका व्यक्तिहरुको कथालाई समेटिएको छ।

वास्तविक घटनाको पीडालाई कलाकारहरुले जीवन्त अभिनयमार्फत प्रस्तुत गरेका छन् ।

शोभित बस्नेत प्रस्तुतकर्ता रहेको डकुड्रामामा सलिना बस्नेत र आर्यन पौडेल मुख्य भूमिकामा छन्।

७ एपिसोडको डकुड्रामामा रुस्मा राई, जयकिशन बस्नेत, उदय सुब्बा, राजु गिरी, सरिता गिरी, सुमिन गुरुङ, सुशान्तकुमार श्रेष्ठ, उमा कार्की, पुरन थापा, लय सङ्ग्रौला, सुस्मा लामा, समीर खान र गणेश बुढाथोकीको अभिनय छ।

डकुड्रामाका प्रस्तुतकर्ता शोभित बस्नेतले देशका विभिन्न क्षेत्रमा रहेका असहाय, पीडितको सहयोगार्थ डकुड्रामा बनाइएको बताए। यो डकुड्रामामार्फत सात प्रदेशबाट ७ जना अशक्त, आर्थिक रूपमा कमजोर व्यक्तिलाई छनोट गरिएको थियो।

रामजी राउतको निर्देशन रहेको डकुड्रामामा सुशील देवकोटाको लेखन रहेको छ। यस डकुड्रामालाई सौरभ लामाले खिँचेका हुन्। शोभितका अनुसार यो डकुड्रामा असोज १२ गतेबाट हरेक शनिबार ओएसआर डिजिटलबाट प्रसारणमा आउनेछ।