हङकङको काइताक निर्माणस्थलमा आगलागी

हङकङको काइताकमा नयाँ विकास क्षेत्रमा रहेको निर्माण स्थलमा आगलागी भएको छ।

बुधबार बिहान सवा १० बजेतिर कन्कर्ड रोडमा रहेको सोगो डिपार्टमेन्ट स्टोरको विपरीत दिशामा रहेको निर्माण स्थलमा आगलागी भएको प्रहरीले जनाएको छ।

स्थानीय मिडियाहरूमा उल्लेख भएअनुसार आगलागी भएको उक्त स्थल निर्माणाधीन केइपोइन्ट सपिङ सेन्टरको लागि हो, जुन सार्वजनिक आवास आपूर्तिकर्ता हङकङ हाउजिङ सोसाइटीको परियोजना हो।

अग्नि सेवा विभागले जनाएअनुसार आगलागीमा परेको निर्माणस्थलमा स्काफोल्डिङको एक भाग जलेको छ। यो धातु वा बाँस कुनबाट बनेको हो भनेर छुट्याइएको छैन।

आगो निभाउन झन्डै ४५ मिनेट लागेको विभागले जनाएको छ। आगो के कारण लाग्यो भन्ने पुष्टि भइसकेको छैन। यसबारे अनुसन्धान भइरहेको अधिकारीहरूले बताएका छन्।