युनिकोड
उपप्रधानमन्त्री एवं स्वास्थ्य तथा जनसङ्ख्यामन्त्री उपेन्द्र यादवले जनता समाजवादी पार्टी नेपालको फुटले सरकारलाई कुनै असर नगर्ने बताएका छन्।
रफत सञ्चार क्लबले शुक्रबार भक्तपुरमा गरेको अन्तरसंवाद कार्यक्रममा उपप्रधानमन्त्री यादवले भने, ‘हामी स्थिर सरकारका पक्षमा छौँ, हामीले जहिले पनि स्थिरता खोजेका छौँ, हामीले सरकारलाई दिएको समर्थन जारी छ, हाम्रो कारणले सरकार ढल्दैन, हामी सरकार ढाल्ने खेलमा लाग्दैनौँ।’
जनता समाजवादी पार्टी नेपालका अध्यक्षसमेत रहेका यादवले आफ्नो पार्टीले राजनीतिक स्थिरता, सुशासन, विकास, समृद्धि र सङ्घीय गणतन्त्रको स्थायित्व खोजेको तर्क गर्दै सरकार ढाल्ने खेलमा नलाग्ने बताएका हुन्।
पार्टी फुटाएको विषयमा सर्वोच्च अदालतमा न्यायका लागि जाने पनि उनले बताए।
उपप्रधानमन्त्री यादवले भने, ‘म सरकारको प्रतिनिधित्व गरेर विदेश गएको बेलामा यहाँ षडयन्त्र गरेर पार्टी फुटाइयो, पार्टी फुटाएको विषयलाई लिएर हामी आइतबारसम्म सर्वोच्च अदालबाट कानुनीरूपमा चुनौती दिन्छौँ, सर्वोच्चले पक्कै न्याय दिनेछ र पार्टी फुटलाई बदर गर्नेछ।’
नयाँ पार्टीको नाम, झण्डा र लोगो एउटै भएको अवस्थामा अघिल्लो दिन साँझ आवेदन लिएर भोलिपल्ट पार्टी दर्ता गराएको उनको आरोप थियो।
प्रतिक्रिया