युनिकोड
तिब्बतियन ओरिजिनल ब्लड (टीओबी) समूहका सदस्य तेन्जिन दावा लामाको नागरिकता नक्कली रहेको थप पुष्टि भएको छ। उनको नागरिकतामा शंका उत्पन्न भएपछि प्रहरीले अनुसन्धान अगाडी बढाएको थियो।
उनले आफ्नो नागरिकतामा उल्लेख गरेका बाबुलाई प्रहरी परिसर काठमाडौँले आइतबार कार्यालयमा झिकाएको थियो। तर तेन्जिनले नागरिकतामा उल्लेख गरेका बाबुलाई नै नचिनेको अनुसन्धानमा संलग्न अधिकारीले बताए।
नागरिकतामा हजुरबुवाको नाम तेन्जिङ लामा र बुबा कृष्णबहादुर लामा उल्लेख छ।
‘विवरणमा बाबु भनिएका व्यक्तिलाई हामीले आइतबार कार्यालयमा बोलाएर भेट गराएका थियौँ। तर तेन्जिनले पनि ती व्यक्तिलाई चिनेनन्। र बाबु भनिएका व्यक्तिले पनि तेन्जिनलाई चिनेनन्’, संलग्न अधिकारीले भने, ‘यसबाट पनि उनको नागरिकता नक्कली हो भन्ने थप पुष्टि हुन्छ।’
काठमाडौँ महानगरपालिका ६ ठेगाना उल्लेख भएको जन्मदर्ता र नागरिकता लामाले प्रहरीलाई बुझाएका छन्। जुन विवरणमा जन्मदर्ता विसं २०६३ चैत १० गते गरेको देखिएको छ। उनले नागरिकता २०७९ साल असारमा जिल्ला प्रशासन कार्यालय काठमाडौँबाट लिएका छन्।
यी विवरण भिडाउने क्रममा प्रहरीले वडा कार्यालयलाई पनि पत्र पठाएको थियो। वडा कार्यालयले पनि ती विवरण उपलब्ध नभएको जवाफ प्रहरीलाई पठाएको थियो।
तिहार पहिलेसम्म अभद्र व्यवहारको कसुरमा मात्रै अनुसन्धान गरिरहेका तेन्जिनलाई प्रहरीले कसुर बदलेर अनुसन्धान अगाडी बढाएको छ। अहिले उनीमाथि लागुऔषध र लिखत कीर्तेको कसुरमा पनि अनुसन्धान भइरहेको परिसरका प्रवक्ता एसपी पवनकुमार भट्टराईले बताए। लागुऔषधको मुद्दामा प्रहरीले ९० दिनसम्म हिरासतमा राखेर अनुसन्धान गर्न सक्छ।
बिजुलीबजारको पुलमा पेस्तोलसहित देखिएको फोटो भिडिओ सार्वजनिक भएपछि उनलाई प्रहरीले असोज २६ गते पक्राउ गरेर अभद्र व्यवहारमा म्याद थप गर्दै अनुसन्धान अगाडी बढाएको थियो। पेस्तोल नक्कली भएको र फोटो भिडिओ पनि पूरानो भएको पाइएपछि प्रहरीले अभद्र व्यवहारमै म्याद लिइरहेको थियो।
यसबिचमा प्रहरीले उनको निवासमा खानतलासी लियो। त्यसक्रममा उनको कोठामा लागुऔषध गाँजा फेला परेको प्रहरीको दाबी छ।
जेनजी आन्दोलन हिंसात्मक बनाउन यो समूहको पनि मुख्य भूमिका देखिएको प्रहरीको दाबी छ। सुरुमा शान्तिपूर्ण रुपमा अगाडी बढेको आन्दोलनलाई २३ गते उग्र बनाउन, निषेधित क्षेत्र तोडेर अगाडी बढ्न मोटरसाइकलसहित ठूलो संख्यामा उत्रिएको यो समूहले उस्काएको भिडिओ सार्वजनिक भएको छ।
उनीहरू तीब्बतीयन ओरिजिनल ब्लड (टीओबी) लेखेको ज्याकेटसहित सहभागी भएका थिए।
प्रतिक्रिया