युनिकोड
भारतीय सीमाबाट उद्धार गरी झापा ल्याइएका नेपालीमा कोभिड-१९ को सङ्क्रमण देखिएपनि सरकारी निकायले होसियारीपूर्वक व्यवस्थापकीय कार्य गरेकाले उनीहरुबाट समुदायमा सङ्क्रमण फैलिन पाएको छैन।
सात दिनयता झापाको काँकडभिट्टा, भद्रपुर, कचनकबल, टाघनडुब्बा र गौरीगञ्ज नाकाबाट एक हजार दुई सय जना नेपाल प्रवेश गरेकोमा झापाका दुई सय छन्। उनीहरुलाई आफ्नै पालिकाको क्वारेन्टिनमा लगिएको छ। एक हजार विभिन्न होल्डिङ सेन्टर र सीमा नजिकका क्वारेन्टिनमा बसेका छन्।
भारतबाट आएका ६६ जनालाई विराटनगर र धरानमा पिसीआर परीक्षण गर्दा ३३ जनामा कोभिड-१९ को सङ्क्रमण पुष्टि भइसकेको छ। ती दक्षिणी गाउँपालिका कचनकबलका हुन्। झापामा कूल सङ्क्रमित ३५ जना पुगेका छन्। दुई निको भएर घर फर्किसकेका छन्। झापामा देखिएको संक्रमण प्रदेश १ कै सबैभन्दा धेरै हो।
जिल्ला प्रहरी कार्यालय झापाका प्रहरी उपरीक्षक कृष्णप्रसाद कोइरालाले सीमाबाट उद्धार गरिएका ३३ जनामा कोरोना सङ्क्रमण भएको पाइए पनि उनीहरुलाई उद्धार गर्दा र क्वारेन्टिनमा पुर्याउँदा अत्यन्त सजगता अपनाइएको बताए।
‘सीमामा आइपुगेकालाई तत्काल उद्धार गर्यौँ’, प्रहरी उपरीक्षक कोइरालाले भने, ‘व्यवस्थित क्वारेन्टिनमा राख्यौँ, त्यहीकारण उहाँहरुको सम्पर्कबाट समुदाय जोगियो।’ झापामा भारतबाट आएका सङ्क्रमितबाट समुदायको एक जनामा पनि कोरोना नफैलिएको उनले दाबी गरे।
रेल यातायात सञ्चालन भएपछि भारतको विभिन्न शहरका नेपाली स्वदेश फर्कने क्रम तीव्र छ। झापाको सीमा क्षेत्रसम्म आएपछि नेपाली पक्षबाट सुरक्षित किसिमले उद्धार हुँदै आएको मेचीनगर नगरपालिकाकी उपप्रमुख मीना उप्रेतीले बताइन्। काँकडभिट्टा नाकाबाट मात्र एक हजार नेपाली भित्रिइसकेका छन्।
मध्यरातमा सीमाबाट भित्रिएका नेपालीलाई समुदायमा मिसिन नदिइ उद्धार गर्दै होल्डिङ सेन्टर र क्वारेन्टिनमा जनप्रतिनिधि र प्रहरीले पुर्याउने गरेका मेचीनगर–६ काँकडभिट्टाका वडाध्यक्ष ललित तामाङले बताए।
सीमाबाट भित्रिरहेका नेपालीलाई समुदायमा मिसिन नदिन सीमाको पहिलो पंतिमै नेपाल प्रहरी र सशस्त्र प्रहरीको टोलीलाई स्वास्थ्यकर्मी, स्थानीय जनप्रतिनिधि, सामाजिक अभियन्ता र रेडक्रसकर्मीले सघाउने गरेका छन्।
बिहीबार मध्यरातमा काँकडभिट्टा नाकाबाट तीनसय नेपाली भित्रिएका थिए। उनीहरुलाई मध्यरातमै सीमा क्षेत्रबाट उद्धार गरी यातायातको साधन प्रयोग गरी काँकडभिट्टा माविमा रहेको होल्डिङ सेन्टर, धाइजनस्थित स्वास्थ्य चौकी र इँटाभट्टास्थित आदर्श माविमा रहेको क्वारेन्टिनमा पुर्याइएको मेचीनगरकी उपप्रमुख उप्रेतीले जानकारी दिइन्। उनीहरुमध्ये १४५ जनाको शुक्रबार आरडिटी गर्दा १५ मा एन्टीबडी पोजेटिभ भेटिएको छ।
आफूखुशी घर नपुगुन् भनेर मध्यरातमै बुद्धशान्ति गाउँपालिकाका अध्यक्ष रमेशकुमार भुजेल आफ्नो पालिकाका बासिन्दालाई उद्धार गरी लैजान मेची पुलसम्म पुुगेका थिए। आफ्ना पालिकाका बासिन्दालाई सुरक्षितरूपमा क्वारेन्टिमा भुजेलले बताए। ‘हाम्रो सजगताले पनि समुदायमा भारतबाट आएकाहरुले घुलमिल हुन पाएका छैनन्,’ उनले भने।
भारतबाट आएर झापाको होल्डिङ सेन्टर र क्वारेन्टिनमा बसिरहेका ६६ जिल्लाका बासिन्दा छन्। उनीहरु अधिकांश भारतको कोभिड–१९ को सङ्क्रमण फैलिएको दिल्ली र मुम्बइबाट आएका हुन्। कोभिड–१९ को जाँच नगरी उनीहरुलाई आफ्नो जिल्लामा नपुर्याइने जिल्लास्थित कोरोना सङ्क्रमण, रोकथाम, नियन्त्रण तथा अनुगमन समितिका संयोजक सोम पोर्तेलले बताए। रासस
प्रतिक्रिया