रौतहटका पुजारीको हत्या अभियोगमा प्रहरीले दुई जनालाई पक्राउ गरेको छ।
रौतहटको माधवनारायण नगरपालिका २ खैस्रैया चोकस्थित हनुमान मन्दिरका पुजारी ६५ वर्षीय राम शाहको हत्या अभियोगमा दुई जना पक्राउ परेको प्रदेश नं २ का प्रहरी प्रमुख डीआईजी धिरजप्रताप सिंहले जानकारी दिए।
पक्राउ पर्नेमा देवाही गोहानी नगरपालिका १ करुनियाका ३६ वर्षीय नरेश भन्ने राम नरेश राउत पटेल र सोही ठाउँका २८ वर्षीय बालकुमार पटेल रहेका छन्।
अन्य केही व्यक्ति पनि संलग्न रहेको खुलेको प्रहरीले जनाएको छ। उनीहरुलाई बुधबार बौधिमाई नगरपालिका ७ बाट पक्राउ गरिएको डीआईजी सिंहले बताए।
भदौ तीन गते साँझ पुजारी साहको गोलि हानी हत्या भएको थियो।
प्रारम्भिक अनुसन्धानको क्रममा राम नरेश पटेलले कटुवा पेस्तोल प्रयोग गरी हत्या गरेको र बालकुमार पटेलले घटनास्थलमा मानिसको आवतजावत निगरानी गरेको खुलेको छ।
राम नरेश पटेलको बुबाले रकम ब्याजमा लिएको र रकम तिर्ने क्रममा बिबाद भएको पाइएको छ। मृतक पुजारीको मन्दिर नजिक ३ वटा रक्सी पसल रहेको र रक्सी सेवन पश्चात मन्दिरको धारामा आएर खुट्टा धुने, पानी खाने र घटना हुनुभन्दा तीन दिन अघि पनि राम नरेश र पुजारी बिच बिबाद भएको खुलेको छ।
यसअघि गाउँका विभिन्न छलफलमा समेत पुजारी र राम नरेशको बिचमा पटक पटक विवाद हुने गरेको थियो। घटनामा संलग्न अन्यको खोजी भइरहेको डीआईजी सिंहले बताए।
प्रदेश नं २ प्रहरी कार्यालय र जिल्ला प्रहरी कार्यालय रौतहटको टोलीले उनीहरुलाई पक्राउ गरेको हो।
प्रतिक्रिया