राष्ट्रिय खेलकुद परिषद् (राखेप) को बोर्ड बैठक करिब ३ वर्षपछि शुक्रबार बस्दै छ। आठौँ राष्ट्रिय खेलकुदअघि बसेको राखेपको बोर्ड बैठक त्यसयता बस्न सकेको छैन।
राखेपको १ सय १२ औँ बोर्ड बैठक युवा तथा खेलकुदमन्त्री महेश्वरजंग गहतराजको अध्यक्षतामा युवा तथा खेलकुद मन्त्रालयमा बस्दै छ।
बोर्ड बैठकमा मन्त्रीस्तरीय निर्णयबाट नियुक्त गरेका र हटाएका सदस्यलाई भने बोलाइएको छैन।
बैठकमा सहभागी हुन गण्डकी खेलकुद परिषद्का सदस्यसचिव तेज गुरुङ भने काठमाडौँ आएका छन्।
बैठक नवौं राष्ट्रिय खेलकुद र एशियाली खेलकुदको विषयमा केन्द्रित हुने राखेप सदस्य सचिव टंकलाल घिसिङले जानकारी दिए।
उनले भने, ‘नवौँ राष्ट्रिय खेलकुदलाई कसरी व्यवस्थापन गर्ने भन्ने विषयमा छलफल गरेर निर्णय गर्छौं, बैठकले गरेका निर्णयहरु आज साँझ नै सार्वजनिक गछौँ।’
नवौं राष्ट्रिय खेलकुद जेठ २२ देखि २८ गते सम्म गण्डकी प्रदेशको राजधानी पोखरामा हुँदै छ।
Shares
प्रतिक्रिया