युनिकोड
अमेरिकाको राष्ट्रपति डोनाल्ड ट्रम्पको चेतावनीपछि इरान प्रदर्शनकारीलाई मृत्युदण्ड दिने निर्णयबाट पछि हटेको छ।
रोयटर्सको रिपोर्टअनुसार इरानका विदेशमन्त्री अब्बास अराक्चीले बुधबार कसैलाई मृत्युदण्ड दिने योजना नरहेको स्पष्टीकरण दिएका हुन्।
फक्स न्युजको 'स्पेसल रिपोर्ट विथ ब्रेट बेयर'मा उनले भनेका छन्, 'मृत्युदण्डको कुनै योजना छैन। मृत्युदण्डको त कुरै उठेको छैन।'
त्यसो त ट्रम्पले पनि बुधबार अब इरानले कुनै प्रदर्शनकारीलाई मृत्युदण्ड नदिने बताएका थिए।
बुधबार इरानी सरकारले २६ वर्षीय प्रदर्शनकारी इरफान सोल्टानीलाई मृत्युदण्ड दिने घोषणा गरेको थियो।
तर ट्रम्पले इरानले त्यसो गरेमा उसविरुद्ध अमेरिकाले कडा सैन्य कारबाही गर्ने चेतावनी दिएका थिए।
बीबीसी सम्बद्ध सीबीएस न्युजसँग कुरा गर्दै ट्रम्पले भनेका थिए, ‘यदि उनीहरूले मृत्युदण्ड दिए भने तपाईंले केही चिज देख्नुहुनेछ... यदि उनीहरूले त्यसो गरे भने हामी धेरै कडा कारबाही गर्नेछौँ।’
देशमा बढेको महँगी र बिग्रँदो आर्थिक अवस्थाको विरोधमा इरानमा गत डिसेम्बर २८ देखि विरोध प्रदर्शन जारी छ।
जारी प्रदर्शनमा १२ हजार जनासम्म मारिएको आशंकाका समाचार आइरहेका छन्।
प्रतिक्रिया