युनिकोड
केएनपी निरोलेक राष्ट्रिय महिला भलिबल प्रतियोगिताको उपाधिका लागि न्यू डायमन्ड युथ स्पोर्टस् क्लब र नेपाल पुलिस क्लब भिड्ने भएका छन्।
प्रतियोगितामा लगातार दोस्रो जित निकालेसँगै न्यू डायमन्ड र पुलिस क्लबले उपाधि भिडन्त पक्का गरेका हुन्। बिहीबार त्रिपुरेश्वरस्थित राष्ट्रिय खेलकुद परिषद्को कभर्डहलमा भएको खेलमा न्यू डायमन्डले एपीएफलाई २५-१६, २५-२१, १९-२५, १९-२५ र १५-७ ले पराजित गरेको हो।
पहिलो र दोस्रो सेट लगातार आफ्नो पक्षमा पारेको न्यू डायमन्डले त्यसपछिका दुई सेट लगातार गुमाउन पुग्यो। तर अन्तिम सेट आफ्नो पक्षमा पार्दै न्यू डायमन्डले जित हात पारेको हो।
लगातार दोस्रो जितसँगै डायमन्ड र पुलिस क्लबले समान ५ अंक जोडेका छन्। डायमन्डले लगातार दोस्रो जित निकालेसँगै एपीएफले लगातार दोस्रो हार व्यहोरेको छ।
डायमन्डले पहिलो खेलमा त्रिभुवन आर्मी क्लबलाई ३-० को सोझो सेटमा पराजित गरेको थियो। आजै भएको पहिलो खेलमा पुलिस क्लबले आर्मीमाथि ३-२ को सेटमा नै जित निकालेको थियो।
पुलिस क्लबले राउन्ड रोबिनको आफ्नो अन्तिम खेलमा शुक्रबार टिपटप न्यू डायमन्ड स्पोर्टस् युथ क्लबसँग खेल्नेछ।
त्यस्तै, दोस्रो खेलमा विभागीय डर्बीमा एपीएफ र आर्मी भिड्नेछन्। चार टोली सहभागी प्रतियोगितामा राउन्ड रोबिन लिगपछि शीर्ष दुई टोलीले फाइनल र पुछारमा दुई टोली तेस्रो स्थानका लागि खेल्नेछन्।
शेरबहादुर खड्का स्मृति प्रतिष्ठानको आयोजनामा जारी प्रतियोगिताको उपाधि विजेताले ५ लाख रुपैयाँ तथा उपविजेता टोलीले २ लाख ५० हजार रुपैयाँ प्राप्त गर्नेछन्। तेस्रो हुने टोलीले १ लाख २५ हजार र चौथो स्थानमा रहने टोलीले ६२ हजार ५ सय रुपैयाँ प्राप्त गर्नेछन्।
प्रतियोगिताको सर्वोत्कृष्ट खेलाडीले ५० हजार रुपैयाँ पाउनेछन्। विधागततर्फ उत्कृष्ट हुने खेलाडीले जनही २५ हजार रुपैयाँ पाउनेछन्। हरेक खेलको प्लेयर अफ दि म्याचले १५ हजार रुपैयाँ पाउनेछन्।
प्रतिक्रिया