पोखराबाट सुरु भयो प्रदीप र दिव्या स्टारर फिल्म ‘एक्टर’ को सुटिङ

प्रदीप खड्काको मुख्य भूमिका रहेको फिल्म ‘एक्टर’ को छायाङ्कन सुरु भएको छ। पोखराको विन्ध्वासिनी मन्दिरमा आज पूजा गर्दै फिल्मको सुटिङ सुरु गरिएको हो।

फिल्मको शुभसाइत समारोहमा अभिनेता प्रदीप खड्का र नव अभिनेत्री दिव्या रायमाझी उपस्थित थिए। कलाकार दिलिप रायमाझीकी छोरी दिव्याको यो डेब्यु फिल्म हो। 

राजन भुसालको निर्देशनमा बन्ने फिल्ममा प्रदिप र दिव्यासहित आना शर्मा, राजवल्लभ कोइराला, दिव्य देव, सुशील सिटौला लगायतका कलाकारहरुको अभिनय रहनेछ।

अभिनेता खड्काले पहिलो पटक फिल्मी पर्दामा आना र दिव्यासँग सहकार्य गर्न लागेका हुन्। फिल्मको केही दिन अगाडि भैंसीपाटीस्थित कार्यविनायक मन्दिरमा वैद्धिक विधि अनुसार पूजापाठ समेत गरिएको थियो ।

आजबाट सुरू भएको सुटिङको पोखरामा १० दिनको सेड्युल रहेको छ। बाँकी सुटिङ् काठमाडौँमा एक महिनासम्म चल्नेछ।

थमन कुमारी भण्डारी यो फिल्मका निर्माता हुन्। अदृत फिल्मस् र मोती फिल्मस्को प्रस्तुतिमा तयार हुन लागेको यो फिल्मलाई नरेन्द्र मैनालीले छायांकन गर्नेछन्।

फिल्मको लाइन प्रोड्यूसरमा तोरन क्षेत्री रहेका छन् । फिल्मलाई आगामी कार्तिक १५ गते लक्ष्मीपूजाका दिन  प्रदर्शन गरिने छ।