भारतीय वायुसेनाको विमान खेतमा खस्यो

भारतीय वायुसेनाको सुखोई लडाकु विमान मंगलबार दुर्घटनाग्रस्त भएको छ। दुर्घटना महाराष्ट्रको नासिकमा भएको हो।

नासिक रेन्जका विशेष महानिरीक्षक डीआर करालेले सुखोई एसयू–३० एमकेआई विमानका पाइलट र को–पाइलट सकुशल निस्किएको बताए।

भारतीय सञ्चारमाध्यमका अनुसार विमान शिरसगाउँनजिकैको खेतमा दुर्घटना भएको हो।

उक्त विमानलाई विङ कमान्डर बोकिल र उनका सेकेन्ड इन कमान्ड विश्वासले उडाएको अधिकारीले बताए। अर्का प्रहरी अधिकारीले दुवै पाइलट सकुशल बाहिर निस्किएको र सामान्य चोटपटक लागेको बताए।

उनीहरूलाई एचएएल अस्पतालमा भर्ना गरिएको छ। 

उनका अनुसार दुर्घटनापछि विमानमा आगो लागेको थियो, जसलाई निभाइएको छ।

भारतीय वायुसेना, एचएएल सुरक्षा र एचएएल प्राविधिक एकाइका टोलीले घटनास्थलको अवलोकन गरेका थिए।