हङकङ : निर्माणाधीन भवनको २८औँ तलाबाट खसे मजदुर

हङकङको सेन्ट्रल हाइराइजको निर्माणाधीन भवनको प्लेटफर्म भत्किँदा दुई मजदुर घाइते भएका छन्।

सोमबार दिउँसो सेन्ट्रलको नयाँ निर्माणाधीन भवनको २८औँ तलामा काम गर्ने क्रममा प्लेटफर्म भाचिँदा उनीहरू घाइते भएका हुन्।

दुर्घटनाका वेला भवनको उक्त प्लेटफर्ममा एक जना मजदुर रहेको बताइएको छ।

उनी भवनको २८औँ तलाबाट खसेका हुन्। दुर्घटनामा उनको शरीरको तल्लो भागको हड्डी भाँचिएको छ। उनलाई उपचारार्थ क्वीन मेरी अस्पताल पठाइएको छ।

त्यस्तै, प्लेटफर्म भाँचिएर भुइँमा खस्दा अर्का मजदुरलाई पनि चोट लागेको छ। उनको टाउकोमा चोट लागेको छ।

भवन निर्माणको हिपहिङ कन्स्ट्रक्सनले ठेक्का पाएको हो। घटनाको कारणबारे अधिकारीहरूले अनुसन्धान गरिरहेका छन्।