सुनसरी क्षेत्र नम्बर ४ को मतगणना जारी छ। दुई दिन रोकिएर अहिले जारी मतगणनामा नेपाली कांग्रेसका उमेदवार एवम् सञ्चारमन्त्री ज्ञानेन्द्रबहादुर कार्कीले झिनो अग्रता बनाएका छन्।
बराहक्षेत्र नगरपालिका वडा नम्बर ९ को १ हजार मतगणना सकिँदा उनले नेकपा एमालेका उम्मेदवार जगदीश कुसियैतलाई १८४ मतले पछि पारेका छन्।
अब कार्कीको पकड अन्तर्गतकै बराहक्षेत्र नगरपालिका वडा नम्बर १० र ११ को मत गनिँदैछ। कार्कीले आफ्नो पकड क्षेत्रमा ५ सयदेखि एक हजार मतले अग्रता बनाउने अपेक्षा थियो। तर केवल १८४ मतको अग्रता बनाएपछि २०७४ को नतिजा जोगाउन उनलाई चुनौती थपिएको छ।
ताजा अवस्थामा कार्कीले २३ हजार ९०२ मत ल्याएका छन्। उनलाई पछ्याइरहेका कुसियैतले २३ हजार ७१९ मत ल्याएका छन्।
बराहक्षेत्रको मत गनिसकेपछि एमाले उम्मेदवार कुसियैतको पकड क्षेत्रमा मत गनिनेछ।
बराहक्षेत्रका बाँकी २ वडाको गनिसकेपछि भोक्राहा नरसिंह गाउँपालिकाका दुई, कोशी गाउँपालिकाका दुई र हरिनगरका दुई वडाको भोट गनिनेछ।
यी तीनै पालिका एमाले उम्मेदवार जगदीश कुसियैतका प्रभाव क्षेत्रका रुपमा चिनिन्छन्। मत गन्न बाँकी कोशी गाउँपालिका वडा नम्बर ६ कुसियैतको घर भएको क्षेत्र हो। जहाँ उनको बलियो पकड छ।
सुनसरी ४ मा ८१ हजार १९१ मत खसेको थियो। जसमा अहिलेसम्म ६२ हजार ८४ मत गनिसकिएको छ। अब १९ हजार मत गन्न बाँकी रहेको छ।
Shares
प्रतिक्रिया