पक्राउ परेका चिनियाँ एक वर्षदेखि नेपालमै, महाराजगञ्जमा थियो कार्यालय

सय किलो सुन प्रकरणमा पक्राउ परेका चिनियाँ नागरिक जिक्वाङ लिङ एक वर्ष पहिले नै नेपाल आएको खुलेको छ। बिहीबार नेपाल छाडेर भाग्न लागेका लिङलाई प्रहरीले विमानस्थलबाटै पक्राउ गरेको थियो। 

उनलाई पक्राउ गर्नका लागि राजस्व अनुसन्धान विभागले पत्र पठाएको थियो। राजस्वको पत्रपछि अध्यागमन विभागले कालो सूचीमा राखेर पक्राउ गर्न प्रहरीलाई भनेको थियो। 

उनी तिब्बत एयरबाट चीन जानका लागि विमानस्थल पुगेका थिए। राजस्व अनुसन्धान विभागले करिब एक सय सुनसहित केही व्यक्तिलाई पक्राउ गरेको सूचना पाएलगत्तै नेपाल छाड्न लागेका उनको नेपाल बस्ने भिसाको म्याद अझै सकिएको थिएन।

व्यापारिक भिसामा नेपाल आएका उनको भिसाको अवधि अगस्ट २०२३ सम्म थियो।

जिक्वाङले नेपालमा कार्गो कम्पनी पनि सञ्चालन गरेका थिए। उनको नाममा नेपालमा ल्यान्ड एण्ड ओसियन इन्टरनेशनल लजिस्टिक प्राइभेट लिमिटेड सञ्चालनमा थियो। 

उक्त कम्पनीको कार्यालय महाराजगञ्जमा रहेको स्रोतले नेपालखबरलाई जानकारी दिएको छ। २०२२ डिसेम्बर १३ मा नेपाल आएका ती चिनियाँ नागरिक त्यसपछि गएको तथ्य देखिएको छैन। 

उनले नेपाल बस्दा तीन पटक भिजिट भिसासमेत लिएका थिए। २०२२ को सेप्टेम्बर २८ मा तीन महिनाको भिजिट भिसा लिएका थिए। फेरि २०२३ मार्च १० गते पनि तीन महिनाको भिजिट भिसा नै थपेर नेपाल बसे।

२०२३ अप्रिल १६ मा तेस्रो पटक तीन महिनाको भिजिट भिसा थपेका उनले अन्तिम पटक २०२३ मे ११ मा तीन महिनाको ब्यापारिक भिसा लिएका थिए। त्यो भिसाको म्याद २०२३ अगस्ट ९ सम्म थियो।

तर, त्यसअघि नै सुन प्रकरणमा अप्रेसन चलेपछि उनी बिहीबार विमानस्थलस्थित अध्यागमन कार्यालयमा चीन फर्किनका लागि पुगेका थिए।

सोही अवस्थामा उनलाई पक्राउ गरेर राजस्व अनुसन्धान विभागमा बुझाइएको हो। सय किलो सुन प्रकरणमा प्रहरीले तिब्बतीय मुलका एक भारतीयसहित ६ जनालाई पक्राउ गरिसकेको छ। 

पक्राउ पर्नेमा दोलखाको मेलुङ गाउँपालिका–३ घर भई हाल काठमाडौंको साँखु बस्ने २१ वर्षीय दिलिप भुजेल, सोही ठेगाना घर भई स्वयम्भू बस्ने वर्ष ५३ का रामकुमार भुजेल, भोजपुर अरुण गाउँपालिका ४ घर भई हाल बूढानीलकण्ठ बस्ने ४९ वर्षीय हर्कराज राई र पुरानो दिल्ली घर भई हाल काठमाडौंको पानीपोखरी बस्ने ५३ वर्षका भारतीय नागरिक थाप्तेन छिरिङलगायत रहेका छन्।

उनीहरूलाई १० दिन हिरासतमा राखेर अनुसन्धान गर्न उच्च अदालत पाटनले अनुमति दिएको छ। 

यस्तै, यही प्रकरणमा जोडिएका थप व्यक्तिलाई पक्राउ गर्न राजस्व अनुसन्धान विभागलाई जरुरी पक्राउ पुर्जी पनि दिएको उच्च अदालतले जनाएको छ।

यो पनि पढ्नुहोस्ः

• त्रिभुवन विमानस्थलबाट ८० किलोभन्दा बढी सुन बरामद
• पछिल्लो समय विमानस्थलबाट भित्रिने गरेको थियो दैनिक क्विन्टल अवैध सुन
• सय किलो सुन बरामद प्रकरण : एजेन्टसहित समातिए ६ जना
• बरामद सुन डेढ सय किलोभन्दा बढी, एकै जनाको भएको अनुमान
• यी हुन् सय किलो सुन बरामद प्रकरणमा पक्राउ परेका ४ जना
• सुन तस्करीमा सरकार आवद्ध दलकै नेता मुछिनु गम्भीर विषय : पोखरेल
• सय किलो सुन बरामद प्रकरण : भन्सार अधिकृत चन्द निलम्बन
• एक महिनायता विमानस्थलबाट भित्रिरहेको थियो दैनिक १ क्विन्टल अवैध सुन
• प्रहरी र भन्सार अधिकृतको मिलेमतोमा यसरी छुट्यो विमानस्थलबाट १०० किलो सुन
• सय किलो सुन बरामद प्रकरण : गृहमन्त्रीले बोलाए भन्सारका महानिर्देशकलाई
• सय किलो सुन प्रकरण छानबिनका लागि समिति गठन
• विमानस्थलमा बरामद सुनमा मेरो हात छैन, तस्करसँग चिनजान पनि छैन : दीपक मल्होत्रा
• ‘सुन तस्करीमा संलग्न भए भागिसक्थेँ, पुष्टि भएमा सजाय भोग्न तयार छु’
• बरामद सय केजी सुन राष्ट्र बैंकबाट विमानस्थल भन्सारमै फर्काइयो
• तस्करीको थप सुन रहेको सूचनापछि राजस्वको टोली फेरि पुग्यो एयरपोर्ट भन्सार
• बरामद सुन परीक्षणका लागि टक्सार महाशाखा लगियो (तस्बिरहरू)
• विमानस्थल पुगेको विभागको टोलीले थप सुन भेटाएन
• सय किलो सुन प्रकरण : विमानस्थलबाट भाग्न लागेको अवस्थामा पक्राउ परे चिनियाँ नागरिक
• टक्सार महाशाखामै राखिन्छ बरामद भएको सुन, थप परीक्षणका लागि पत्र पर्खंदै राष्ट्र बैंक
• सय किलो सुन प्रकरणमा पक्राउ परेका ६ जनालाई १० दिन हिरासतमा राख्न अनुमति
• सय किलो सुन तस्करी : राजस्वले लियो थप व्यक्तिविरुद्ध जरुरी पक्राउ पुर्जी