नक्कली भुटानी शरणार्थी प्रकरणमा तीन प्रतिवादीको तर्फबाट बहस सकिएको छ। उच्च अदालत पाटनमा मंगलबार भएको बहसमा प्रतिवादीहरू नरेन्द्र केसी, आङतावा शेर्पा र टेकनारायण पाण्डेको तर्फबाट बहस सकिएको हो।
उच्च अदालतका न्यायाधीश जनक पाण्डे र प्रकाश खरेलको इजलासमा बहस भएको थियो। यो मुद्दा हेर्दाहेर्दैमा राखिएको छ। अब निरन्तर सुनुवाइ हुन्छ।
नेपाली नागरिकलाई भुटानी शरणार्थी बनाउँदै अमेरिका पठाउन खोजेको अभियोगमा पुर्पक्षका लागि थुनामा गएका अभियुक्तहरूले उच्च अदालतमा दिएको निवेदनमा मंगलबार सुनुवाइ भएको हो।
प्रतिवादीका तर्फबाट ६० जनाभन्दा बढी कानुन व्यवसायीले बहस गर्दैछन्।
यस प्रकरणमा पूर्वमन्त्रीद्वय बालकृष्ण खाँण, टोपबहादुर रायमाझी, पूर्वगृहसचिव टेकनारायण पाण्डे, पूर्वसभासद् आङटावा शेर्पा, भुटानी शरणार्थी नेता टेकनाथ रिजाल, हज कमिटीका पूर्वअध्यक्ष शमशेर मियाँ र तत्कालीन गृहमन्त्रीका सल्लाहकार इन्द्रजित राई, पूर्वमन्त्री खाणका स्वकीय सचिव नरेन्द्र केसी, टोपबहादुरका छोरा सन्दीप, बिचौलिया केशव दुलाल, सानु भण्डारी, सन्देश शर्मा, रामशरण केसी, गोविन्द चौधरी, हरिभक्त महर्जन र सागर राई पुर्पक्षका लागि थुनामा छन्।
आफूहरूलाई थुनामा राख्ने जिल्ला अदालतको आदेशविरुद्ध उनीहरूले उच्च अदालत, पाटनमा दिवेदन दिएका थिए।
Shares
प्रतिक्रिया