दमकको लाइफलाइन अस्पतालमा आगलागी, दुई करोडभन्दा धेरैको क्षति

झापाको दमकस्थित लाइफलाइन अस्पतालसहित स्थानीय तीन घरमा मङ्गलबार राति आगलागी हुँदा दुई करोडभन्दा बढीको क्षति भएको छ।

अस्पताल नजिक रहेको प्रेमबहादुर धिमालको घरबाट सल्केको आगो अन्य तीन घरमा फैलिँदा दुई करोडभन्दा धेरैको क्षति भएको प्रहरीले जनाएको छ।

जिल्ला प्रहरी कार्यालय झापाका अनुसार धिमालको घरबाट सुरु भएको आगो अस्पतालको डाइलिसिस गराउने भवनमा फैलदा अस्पतालका उपकरण र अन्य सामाग्री नष्ट भएका छन्।

अस्पतालका अध्यक्ष डा. मुक्तिनाथ भट्टराईका अनुसार डाइलिसिस मेसिन काम नलाग्ने भएकाले अस्पतालको डाइलिसिस सेवा पूर्णरुपमा बन्द भएको छ।

दमक नगरपालिका, कमल गाउँपालिका, पथरीशनिश्चरे नगरपालिका, उर्लाबारी नगरपालिकालगायत स्थानीय निकायका छ वटा वारुण यन्त्र, नेपाल प्रहरी, सशस्त्र प्रहरी बल र स्थानीयको सहयोगमा आगो निभाइएको थियो।