युनिकोड
बुधबार बिहान झण्डै सवा ११ बजेतिर त्रिभुवन अन्तर्राष्ट्रिय विमानस्थलमा एक्कासि ठूलो आवाज सुनियो। त्यो आवाजसँगै विमानस्थलको पूर्वी छेउमा धुवाँको मुस्लोसहित आगोको ज्वाला दन्किएको देखियो। त्यतिबेला विमानस्थल वरपरको जमिन पनि थर्किएको थियो।
यो भयानक दृश्यको साक्षी बनेका रामकुमार केसीले सौर्य एयरलाइन्स दुर्घटनाको घटना विवरण सुनाए।
बानेश्वर निवासी केसी नियमित झै पशल खोलेर साथीभाइसँग खफिरहेका थिए। 'सुरुमा ड्याम्म आवाज सुनियो, के भएछ भनेर यसो अगाडि हेर्दा त धुँवाको मुस्लोसहित आगोको ज्वाला अगाडि नै आयाे', केसीले भने, 'आगोको रापले पसल छोडेर भाग्नुपर्यो, साथीभाइबीच कोलाहल मच्चियो, डरले हातखुट्टा लगलग काँपे, पाइला चाल्न सकिएन। आवाज पनि निस्किएन। विस्तारै समालिएँ । नजिकै गएर हेर्दा त विमान दुर्घटना भएर घाइतेहरू घटपटाइरहेको दृश्य देखियाे। त्यसले झनै मन क्षतविक्षत भयो।'
विमान दुर्घटनास्थलसँगै रहेकाे पेप्सिकोला खहरेस्थित जेजे मोटर पार्टस एण्ड ट्रेडिङ कम्पनीका सञ्चालक केसीले उक्त स्थानमा विगत छ वर्षदेखि सवारीसाधनको मोटर पार्टस तथा मर्मत पसल सञ्चालन गर्दै आएका छन्।
आँखै अगाडि कहाली लाग्दो विमान दुर्घटनाको दृश्यले केसीको मनमा छटपटी बढ्यो । मुखबाट शब्द निस्केन । एक छिन त हात–खुट्टाले पनि काम गरेन। भाग्यवस आफूहरू बाच्न सफल भएको उनले बताए।
'धावनमार्ग नजिकको कन्टेनर र सँगैको झाडीसहितको कान्लामा नठोक्किएको भए उक्त जहाज सिधै बस्तीमा पस्ने थियो र हामीलगायत अरु धेरैको ज्यान जाने खतरा हुन्थ्यो, धन्न बाँचियो', केसीले भने।
विमानले धावनमार्गसँगैको कन्टेनरमा ठक्कर दियो र भित्तामा बजारियो। आगोको मुस्लो र धुँवाले नजिक केही देखिएन। आगो लागेको करिब पाँच मिनेटमा दमकल आइपुगेकाे केसीले बताए।
'जहाज माथिबाट जल्दै झरेको देख्याैँ। आगो दन्कियो, आवास र गन्ध आइरहेको थियो', केसीले भने, ' करिब २५ मिनेटमा आगो नियन्त्रणमा आयो र उद्धार गर्न सुरु भयो । घाइतेको उद्धार र शव निकालेर एम्बुलेन्समा हालियो। एम्बुलेन्सको आवास, मानिसको कोलाहलले दुर्घटनास्थलको माहोल भावविह्वल थियो।'
समयमै दमकल पुगेको भए केहीलाई बचाउन सकिन्थ्यो की भन्ने प्रत्यक्षदर्शीको अनुमान छ।
सोही स्थानमा विगत डेढ वर्षदेखि थानापति वर्कसप सञ्चालन गर्दै आएका सुनिल साहीलाई चाहीँ नजिकै जमिनमा विमान बजारिँदा भुँइचालो गएजस्तो लाग्यो रे। ‘यसो हेर्दा त विमानमो दुर्घटना भएको रहेछ,’ कहाली लाग्दाे दृश्य उनले सम्झिए।
'पसलमा बसिरहेको थिएँ, भुँइचालोले जस्तो हल्लायो, जुरुक उठेर हेर्दा त आगोको मुस्लो देखेँ, आगोको रापले पसलमा उभिन सकिएन। पर गएर दुर्घटनास्थल नियालेँ', उनले भने, 'दृश्य हेर्दा कोही पनि बाँचेनन् हाेला भन्ने लागेकाे थियाे। उद्धार टोली ढिलोगरी पुगे। डाँडाबाट दमकलले पानी हाले पनि दुर्घटनास्थलमा पानी पुग्न सकेन। मुख्य आगो लागेको ठाउँ थोरै टाढा थियो।'
सिन्धुपाल्चोक घर भएका सवारीचालक सन्तोष खड्का पनि विमान दुर्घटनाको साक्षी बने । उनले भने, 'गाडीमा रङगरोघन गरिरहेका थियौँ, एक्कासी धुँवाकाे मुस्लाेसँगै आगोको राप आयो, मुटु ढुकढुक भयो, जिउ काम्यो, हेर्दा डरमर्दो थियो। आगोभित्र सुरुमा दुईचार जना मानिस छटपटाइ रहेको देखियो, कोहीको आधा, जीउ कसैको हात घुट्टा छैन, केहीको टाउको थिएन। उद्धारमा ढिलाइ भएकाले धेरैको ज्यान बचाउन सकिएन।'
सुमित कार्कीले पनि वर्कसपबाटै प्रत्यक्ष विमान दुर्घटनाको विभत्स दृश्यको साक्षी बने। 'स्कुल बसमा कलर गर्दै थिएँ। एक्कासी ठूलो आवाजसहित आगो बलेको देखियो। दौडेर सुरक्षित ठाउँतिर गइयो, विमान जलिरहेको भिडियो पनि मोबाइलमा कैद गरेँ। केही समयपछि दमकल र उद्धारकर्मी आए। सायद चाँडै आएको भए केहीको ज्यान बचाउन सकिन्थ्यो की!', उनले भने।
सप्तरीका सुरज पासवान पनि विमान दुर्घटना हुँदा नजिकैको धारामा हातखुट्टा धुँदै थिए। जहाज आवासहित ठोक्किएर आगो लागेको दृश्यले धेरैबेरसम्म बोल्न पनि सकेनन्। आगोको रापले भागाभाग भयो। 'एउटाले हात हल्लाएको देखेँ। अरु जलेर चिन्न नसक्ने अवस्थामा थिए। हातखुट्टा लरबराए, धेरै डर लागेको छ,' उनले भनेँ।
विमान दुर्घटनास्थल नजिकको न्यू संयुक्त अटो वर्कसपमा कार्यरत मजदुर पनि विमान दुर्घटनाका साक्षी बने। त्यहाँको सम्पूर्ण घटनाक्रम नियाले। अनि उनीहरुले मोबाइलमा तस्बीर र भिडियो पनि कैद पनि गरे।
नेपाल नागरिक उड्डयन प्राधिकरणका अनुसार सौर्य एयरलाइन्सको सिआरजे ७ (९एन–एएमइ) कलसाइन विमान बुधबार स्थानीय समयअनुसार बिहान ११ बजेर ११ मिनेटमा पोखरा उडानको क्रममा उड्ने वित्तिकै दुर्घटनाग्रस्त भएको थियो।
चालकदलसहित १९ जना सवार उक्त विमान त्रिभुवन अन्तर्राष्ट्रिय विमानस्थको धावनमार्ग ०२ बाट उडान गर्ने वित्तिकै दाहिने मोडिएर धावनमार्गको पूर्वतिर रहेको स्थानमा दुर्घटनाग्रस्त भई १८ जनाको मृत्यु हुनका साथै एक जना घाइते भएका छन्। घाइतेको सिनामङ्गलस्थित केएमसी अस्पतालमा उपचार भइरहेको छ।
दुर्घटनाबारे प्राधिकरण के भन्छ ?
अन्तर्राष्ट्रिय विमानस्थलमा टावर नजिकै भएको दुर्घटनाले विभिन्न संशय उब्जाएको छ। मिडिया र सामाजिक सञ्जालमा विमान दुर्घटनाबारे विभिन्न विषयहरू आइरहेका छन्। यता नियामक नेपाल नागरिक उड्डयन प्राधिकरणले विमान दुर्घटनाका कारणबारे अहिले नै केही भन्न नसकिने बताएको छ।
प्राधिकरणका सूचना अधिकारी ज्ञानेन्द्र भूलले विमान दुर्घटना के कसरी भयो भन्ने कुरा अत्यन्त प्राविधिक विषय भएकाले अहिले अनुमानका आधारमा भन्न नसकिने बताए। हल्ला भए जस्तो विमान पुरानो वा समयमै मर्मत नभएको भन्नेकुरामा सत्यता नरहेको उनले स्पष्ट पारे।
'विमानको धेरै प्रकारको चेक हुन्छ, निश्चित घण्टा, निश्चित साइकल, ल्याण्डिङपछि गरिने चेक हुन्छ', सूचना अधिकारी भूलले भने, 'विमानको छुट्टै आयु हुँदैन, विभिन्न पार्टको आयु हुन्छ, कुन पार्टस कति सयम अवधिपछि परिवर्तन गर्ने भन्ने हुन्छ।'
दुर्घटनाग्रस्त विमान ‘एयर ओर्दिनेस’ २०२५ सम्म ‘भ्यालिड’ भएको विमान हो। अहिले पनि एक सय १९ घण्टा ‘फ्लाईङ आवर’ बाँकी छदैँ समयमै मर्मतका लागि पोखरा पठाउन लागिएको थियो। इञ्जिनियरले २० देखि २५ दिनको विमानको सम्पूर्ण पार्टसको मर्मत (सी–चेक) गर्नका लागि विमान लगिँदै थियो। सूचना अधिकारी भूलका अनुसार दुर्घटनाको प्राविधि होकी मानवीय कारण भनेर अध्ययन नगरी भिन्न सकिँदैन। रासस
प्रतिक्रिया