युनिकोड
अमेरिकाको टेक्सस राज्यको ह्युस्टनमा भएको नेपाली छात्रा २१ वर्षीया मुना पाण्डेको हत्यामा संलग्न आरोपमा पक्राउ परेका व्यक्तिको परिचय स्थानीय प्रहरीले सार्वजनिक गरेको छ।
ह्युस्टन प्रहरीले बिहीबार (आज) राति हत्या आरोपमा पक्राउ गरिएका व्यक्ति ५१ वर्षीय बब्बीसिंह शाह भएको जानकारी दिएको हो।
यसअघि प्रहरीले मुना बस्ने गरेको अपार्टमेन्टबाट बाहरिँदै गरेको व्यक्तिको सीसीटीभी फुटेज सार्वजनिक गरेको थियो।
ती व्यक्ति शाह नै भएको ह्युस्टन प्रहरीले जनाएको छ। तर उनको ठेगाना तथा हत्याको कारण भने अहिलेसम्म खुलाइएको छैन।
ARRESTED: Booking photo of Bobby Singh Shah, 51, now charged with capital murder in this fatal shooting of a woman.
More info at: https://t.co/xdfY7eP4Dj#HouNews https://t.co/s4hpuNKbRr pic.twitter.com/dnVNTT2DKc— Houston Police (@houstonpolice) August 29, 2024
शाहलाई बुधबार राति ८ बजे ट्राफिक स्टपबाट पक्राउ गरिएको ह्युस्टन प्रहरीले जनाएको छ।
गत सोमबार साँझ मुना पाण्डे ह्युस्टनको वेस्ट एयरपोर्ट बुलेभार्डस्थित आफ्नै अपार्टमेन्टमा गोली लागेको अवस्थामा मृत फेला परेकी थिइन्।
नेपालिज एसोसिएसन अफ ह्युस्टनका द्रोण गौतमका अनुसार पाण्डेलाई तीनवटा गोली लागेको थियो र उनी ओछ्यानमै पल्टिरहेको अवस्थामा भेटिएकी थिइन्।
स्नातक अध्ययनका लागि सन् २०२१ मा अमेरिका गएकी पाण्डे ह्युस्टन कम्युनिटी कलेजमा नर्सिङ विषय पढ्थिन्। सुरुमा साथीसँग बस्ने गरेकी पाण्डे पछि अपार्टमेन्ट लिएर एक्लै बस्न थालेकी थिइन्।
पाण्डेको अन्तिम संस्कारका लागि नेपालबाट उनकी आमा अनिता पाण्डे अधिकारी अमेरिका जान चाहेकी छन्। तर उनले आर्थिक समस्या भएको बताएकी छन्।
यसैबीच मुनाको अन्तिम संस्कार तथा उनकी आमालाई अमेरिका यात्राका लागि खर्च जुटाउन गोफन्डमी अभियान सुरु गरिएको छ।
५० हजार डलर संकलन गर्ने लक्ष्यसहित सुरु गरिएको गोफन्डमी अभियानले सहयोगका लागि सबैसँग अपिल गरेको छ। मुनाकी आमा अनितालाई छोरीको अन्तिम संस्कारका लागि अमेरिका ल्याउन समेत आर्थिक सहयोग गर्नुपर्ने देखिएको अभियानले जनाएको छ।
मुना आफ्नी एक मात्र सन्तान भएको र उनी पनि बितेपछि आफ्नो संसारै सकिएको दुखेसो अनिताले गरेकी छन्।
अपडेट शृंखला-
प्रतिक्रिया