नाडामा सर्वसम्मति नहुने पक्का, चौधरीले प्यानल घोषणा गर्दै

अटो व्यवसायीको छाता संगठन नाडामा सर्वसम्मतको प्रयास असफल भएपछि अध्यक्षका प्रत्याशीद्वय करण चौधरी र ध्रुव थापाले चुनावी प्रतिस्पर्धा नै गर्ने भएका छन्।

सर्वसम्मतिको लागि भन्दै हालसम्म टिम घोषणा नगरेका चौधरीले बुधबार टिम घोषणा गर्ने भएका हुन्।

चौधरीले बुधबार दिउँसो होटल अलफ्टमा आफ्नो टिम घोषणा कार्यक्रम राखेका छन्। सर्वसम्मतिको प्रयास असफल भएपछि टिम घोषणा गर्न लागेको चौधरीको पक्षमा रहेका व्यवसायीले बताएका छन्।

नाडा निर्वाचन एक हप्ता मात्रै बाँकी रहँदा अध्यक्षका उम्मेदवार करण चौधरीले अझै आफ्नो टिम सार्वजनिक गरेका छैनन्।

प्रतिस्पर्धी ध्रुव थापाले प्यानल घोषणा गरी देश दौडाहा गरिरहँदा चौधरीलाई छिटो प्यानल घोषणा गर्न दबाब रहेको थियो।

करण चौधरीले सर्वसम्मतिको लागि टिम घोषणामा ढिलाइ गरेको बताए।

‘मैले सर्वसम्मतिको लागि निर्वाचन नजिकिँदा पनि टिम घोषणा नगरेको हो’, चौधरीले नेपालखबरसँग भने, ‘मैले टिम घोषणा गरेपछि सर्वसम्मतिको सम्भावना रहँदैन।’

नाडाका पूर्वअध्यक्ष शम्भु दाहाललगायतले सर्वसम्मतिको प्रयास गरे पनि सफल हुन सकेन।

‘पूर्वअध्यक्षसँग बसेर सर्वसम्मतिको लागि छलफल गरेका थियौँ तर सफल हुन सकेन’, करण चौधरीको पक्षमा लागेका एक जना नाडा कार्यसमिति सदस्यले भने।

नाडाको ४५औँ साधारणसभा मंसिर २२ गते काठमाडौंमा हुँदै छ। पोखराबाट उदाएका ध्रुव थापाले आफ्नो टिमसहित लगातारजसो अटो व्यवसायीसँग छलफल गरिरहेका छन्।

नाडामा अध्यक्षसहित १७ जना निर्वाचित हुन्छन्। ध्रुव थापाले यसअघि नै १७ जनाको टिम सार्वजनिक गरिसकेका छन्।

जसमा हुन्डाईका निराकर श्रेष्ठ, टीभीएसका दीपक कुमार अग्रवाल, फोर्डका आकाश गोल्छा, बीवाईडीकी यमुना श्रेष्ठ, एसएमएल इसुजुका कपिल सिवाकोटी छन्।

त्यसबाहेक प्रदिममान प्रधान, आमर ज्योति रञ्जित, बीएन पाठक, दिपक कुमार मिश्र, नारायण प्रसाद पौडेल, नवराज भुषाल, प्रकाश सिक्देल, रिद्धि कार्की, सगुन कन्साकर, सञ्जय कुमार खेतान, सुवासिस थपलिया रहेका छन्।

धु्रवबहादुर थापाले आफू र आफ्नो टिम नेतृत्वमा आएपछि गरिने नीतिगत सुधारहरु, सचिवालयमा गरिने सुधारहरु, नाडा अटो शोको प्याटेन्ट लिनेदेखि मोफसलमा पनि केन्द्रकै आयोजनामा अटो शो गरिने अवधारणा अघि सारेका छन्।

थापालाई ठूला नेटवर्क भएका हुन्डाई, टीभीएस, फोर्डबाहेक पोखराका अधिकांश व्यवसायीको समर्थन रहेको छ। रिकन्डिसन, पार्ट्सतर्फका अधिकांश व्यवसायी थापालाई सहयोग गरिरहेका छन्।

अध्यक्षका प्रतिस्पर्धी ध्रुव थापाले यसअघि आफुले कृष्ण दुलालको लागि अध्यक्ष पद छाडेको भन्दै यो पटक आफू नछाड्ने बताए।

उनले सर्वसम्मतिको लागि सधैँ आफूले त्याग गरेकोले यो पटक प्रतिस्पर्धामा उत्रिएको बताए।

‘करण चौधरी अघिल्लो पटक मात्रै नाडामा प्रवेश गर्नुभएको हो। अझै एक कार्यकाल उपाध्यक्ष बसेर मलाई सहयोग गर्नुस् भनेको मान्नुभएन’, थापाले नेपालखबरसँग भने, ‘उहाँले नछाडेपछि यो पटक निर्वाचन हुने देखिन्छ।’

उनले सहमतिभन्दा लोकतान्त्रिक विधिअनुसार प्रतिस्पर्धा नै देखिएको बताएका छन्।