प्रकाश सपुत भन्छन् : ‘वसन्त’ मेरो अर्को परीक्षा हो

गायन तथा अभिनयमा रमाइरहेका कलाकार प्रकाश सपुत पछिल्लो समय चलचित्र निर्माण र निर्देशनमा होमिएका छन्।

निर्देशकका रूपमा सपुतले आइतबार आफ्नो पहिलो चलचित्र ‘वसन्त’ निर्माणको घोषणा गरेका छन्। काठमाडौँमा आयोजित एक समारोहबीच चलचित्रको शीर्षक भिडिओ सार्वजनिक गरे।

हेर्नुहोस् भिडिओ–

सपुत नारायण रायमाझीद्वारा निर्देशित चलचित्र ‘परेदशी २’बाट अभिनेताका रूपमा उदाएका हुन्। 

‘वसन्त’मा पनि उनी आफैँ मुख्य पात्रका रूपमा देखिँदै छन्। ‘परदेशी २’को अनुभव र दर्शकबाट पाएको विश्वासले चलचित्र निर्माण र निर्देशनमा आँट दिलाएको सपुतले बताए। चलचित्र निर्देशनलाई उनले आफ्नो अर्को सपनाका रूपमा अर्थ्याए।

गायनमा प्रवेश गर्दाताका नै सपुतले चलचित्रमा अभिनेता बन्ने सपना रहेको सुनाउँथे। गायनसँगै म्युजिक भिडिओको अभिनय र नृत्यमा पनि सपुतलाई दर्शकले रुचाएका थिए।

‘अभिनेताका रूपमा ‘परदेशी २’लाई मैले परीक्षाका रूपमा लिएको थिएँ, निर्देशकीय हिसाबले ‘वसन्त’ अर्को परीक्षा हो’, सपुतले भने, ‘पहिलेदेखि सँगालेको सपना पूरा गर्न पाउँदा उत्तिकै उत्साहित पनि छु।’

चलचित्र ‘वसन्त’ आफ्नो पुस्ताले बाँचेको समयको कथामा आधारित रहेको उनले सुनाए। ‘चलचित्रमा दर्शकले आफ्नै गाउँठाउँको कथा पाउनेहुनेछ, यसमा नेपालीपन छ, लवज छ, मौलिक सङ्गीत छ’, सपुतले भने, ‘चलचित्रले हाम्रै समयको कथा भन्छ- सामाजिक विषयवस्तु यसमा मुखरित छ।’

चलचित्रमा आफ्नै जन्मथलो बागलुङको धम्जा गाउँको परिवेश र कथावस्तु चित्रित हुने उनको भनाइ छ।

सपुतले आफ्नो भोगाइ र अनुभवलाई चलचित्रको कथामा ढालेको बताए। विश्वकर्मा समुदायको युवकले लेखक बन्ने सपना पूरा गर्न गरेको सङ्घर्ष र उसको प्रेमकथालाई चलचित्रमा देखाउन खोजिएको सपुतले सुनाए। 

‘मैले गायकका रूपमा जुन परिचय बनाएको छु, त्यसको सफलताको भारी कहीँ न कहीँ मेरो चलचित्र निर्माण, निर्देशन र अभिनयमा पनि जोडिन्छ’, उनले भने, ‘यो मेरा लागि अवसर र चुनौती दुवै हो, बाँकी त दर्शकको हातमा छ।’ कथा, सङ्गीत, निर्देशन, पात्र र चरित्र निर्वाहका दृष्टिले चलचित्रमा नेपालीपन दिन खोजिएको उनको भनाइ छ।

चलचित्रमा ‘वसन्त’ पात्रका रूपमा सपुत स्वयंको मुख्य भूमिका छ। अर्को मुख्य पात्र ‘शान्ति’का रूपमा अभिनेत्री स्वस्तिमा खड्का छिन्।

चलचित्रमा अनुप बराल, प्रकाश घिमिरे, कमलमणि नेपाललगायतको अभिनय रहनेछ।

गलबन्दी प्रोडक्सनको ब्यानरमा बन्ने उक्त चलचित्र आउँदो वसन्त याममा प्रदर्शनमा आउने सपुतले जानकारी दिए।

‘आउँदो चतै दसैँ र नयाँ वर्षको छेको पारेर चलचित्र प्रदर्शन ल्याउने तयारीमा छौँ’, उनले भने। चलचित्रको कथा र सङ्गीत पनि सपुत आफैँले तयार पारेका हुन्। 

चलचित्रको सहनिर्देशन सुनिल विकले गर्ने जनाइएको छ। चलचित्रको कार्यकारी निर्मातामा मोहन विश्वकर्मा, अनुरोध भट्टराई र नेन्सी शेरचन छन्। 

बागलुङको काठेखोला गाउँपालिका–३ धम्जामा जन्मिएका सपुतका ‘गलबन्दी’, ‘बोलमाया’, ‘पिर’, ‘सकम्बरी’, ‘दमाइ महाराज’, ‘बदला बरिलै’, ‘कुरा बुझ्नुपर्छ’लगायत गीत चर्चित छन्।

सामाजिक मुद्दालाई सिर्जनामा मुखरित गर्न पारङ्गत उनी गीतमा कथानकको प्रयोग गर्न सक्ने स्रष्टाका हिसाबले पनि चिनिन्छन्। सपुतका कतिपय रचनाका विषयमा सार्वजनिक विवाद र बहससमेत हुने गरेका छन्। 

विसं २०६९ मा ‘मुसुमुस नहाँस मायाले’ बोलको लोकदोहोरी गीतबाट साङ्गीतिक यात्रा तय गरेका सपुत अहिलेका सर्वाधिक सफल कलाकारका रूपमा चिनिन्छन्।

मौलिक गीत ‘गलबन्दी’बाट चर्चाको उचाइमा पुगेका उनका गीतका म्युजिक भिडिओले युट्युबमा करोडौँ ‘भ्युज’ पाएका छन्।

साङ्गीतिक यात्राका क्रममा देशविदेशका कार्यक्रममा पुग्न भ्याईनभ्याई नहुने सपुतलाई चलचित्र लेखन, निर्माण तथा निर्देशन कत्तिको फाप्ने हो त्यसका लागि भने आउँदो वसन्तु ऋतु कुर्नैपर्छ। रासस