युनिकोड
विश्वकप जितेर टी–२० अन्तर्राष्ट्रिय क्रिकेटबाट सन्न्यास घोषणा गरेका भारतीय क्रिकेट टोलीका कप्तान रोहित शर्माले समयको एउटा चक्र पूरा भएको बताएका छन्।
आफ्नो सन्न्यास र भारतीय टोलीको जितबारे समाचार एजेन्सी पीटीआईसँग कुरा गर्दै उनले भने, ‘कसैले मलाई भर्खरै भने कि जब मैले २००७ मा भारतबाट खेल्न थालेँ, देशले विश्वकप जितेको थियो। अब म विश्वकप जितेर टी–२० अन्तर्राष्ट्रिय फर्म्याट छाड्दै छु।’
उनले थपे, ‘जब म सन् २००७ मा पहिलोपटक भारतबाट खेलेको थिएँ, म आयरल्यान्ड गएको थिएँ। त्यहाँ हामीले ५० ओभरको खेल खेल्यौँ। त्यसको लगत्तै हामी टी–२० विश्वकप खेल्न दक्षिण अफ्रिका गयौँ। हामीले त्यो पटक पनि जित्यौँ र यसपटक पनि जित्यौँ। यसरी समयको एउटा चक्र पूरा भयो।’
शनिबार बार्बाडोसमा भएको फाइनलमा भारतले दक्षिण अफ्रिकालाई ७ रनले हराएपछि रोहित शर्मालाई विश्वभरका दिग्गज खेलाडी र क्रिकेट फ्यानबाट बधाई तथा शुभकामना आइरहेका छन्।
टी–२० विश्वकप जितेर भारत १७ वर्षपछि फेरि च्याम्पियन बनेको हो।
यस अवधिमा भारतले तीनवटा विश्वकप जितेको छ- दुई टी–२० र एक ओडीआई कप।
प्रतिक्रिया