भारतीय मौसम विज्ञान विभागका अनुसार चक्रवात रामलले गति लिएर अबको केही घण्टामा ठूलो चक्रवाती आँधीमा परिणत हुन सक्नेछ।
यो चक्रवात २६ मेको मध्यरातमा बंगलादेश र पश्चिम बंगालको तटमा पुग्न सक्छ।
भारतीय मौसम विज्ञान विभागले सागर टापुबाट करिब ४२० किलोमिटर दक्षिणमा रहेको पूर्वी–मध्य बंगालको खाडीमा रहेको भारी न्यून चापीय रेखा रहेको जनाएको छ।
चक्रवात रामललाई ध्यानमा राख्दै भारतीय मौसम विज्ञान विभागले चेतावनी जारी गरेको छ।
तटीय क्षेत्रका माछा मार्नेहरूलाई समुन्द्रमा नजान आग्रह गरिएको छ । समुन्द्रमा रहेकाहरूलाई फर्किन भनिएको छ।
पश्चिम बंगालको दक्षिण २४ परगना र उत्तर २४ परगना जिल्लाहरूमा पनि चेतावनी जारी गरिएको छ र मानिसहरूलाई कमजोर भवनहरू खाली गर्न भनिएको छ।
हावाहुरीका कारण धेरै ठाउँमा बाढी आउन सक्ने तथा बिजुली तथा सञ्चार सम्पर्कमा क्षति पुग्न सक्ने मौसम पूर्वानुमान महाशाखाले चेतावनी दिएको छ।
भारतीय मौसम विभागका अनुसार पश्चिम बंगालका अन्य धेरै तटीय जिल्लाहरू यस आँधीबाट प्रभावित हुनेछन् र यसको प्रभाव त्रिपुरा, असम, नागाल्यान्ड र मणिपुरमा पनि पर्नेछ।
Shares
प्रतिक्रिया