चितवन २ ले यस पटक पाहुनालाई बिदा गरेर पठाउँछ : रामप्रसाद न्यौपाने (अन्तर्वार्ता)

मंसिरको निर्वाचनमा विजयी रवि लामिछाने पनि प्रतिस्पर्धामा छन्। उनको उम्मेदवारीलाई चुनौतीको ठान्नुभएको छैन?
मूल कुरा जनतासँगको सम्बन्ध हो। जनताको मत हो। मलाई के लाग्छ भने जनताले त्यसबेला एक प्रकारको आक्रोश पोखेर नयाँ दलका उम्मेदवारलाई भोट हाले। तर यो पटक त्यस्तो हुँदैन। किनभने सम्बन्धित दलहरुले जे कुरा लिएर मतदातासमक्ष जानुभएको थियो, त्यो कुरा पूरा गर्न सक्नुभएन। अर्को कुरा चितवनमै जन्मिएर, यहीँको माटोमा हुर्किएर, यहाँको भुगोल बुझेको युवा उम्मेदवारलाई मतदाताले रुचाउनुहुन्छ भन्नेमा ढुक्क छु। बाहिरी मान्छेलाई उहाँहरुले जिताउन लाग्नुहुन्न भन्ने लाग्छ। 

तपाईंका लागि चुनौती त गठबन्धनका जीतनारायण श्रेष्ठ पनि हुन् नि? स्थानीयसमेत रहेका उहाँलाई प्रतिस्पर्धी मान्नु हुन्न? 
त्यस्तो होइन, मेरा प्रतिस्पर्धी सबै उम्मेदवार हुन्। कोही कडा प्रतिस्पर्धी होलान् कोहीले कम चुनौती देलान्। तर, मैले गठबन्धनको मात्रै नभई सबै उम्मेदवारलाई प्रतिस्पर्धी ठानेको छु। म मूलतः जनतालाई नै आव्हान गर्दछु। यो मूल पार्टीपंक्ति एउटा भयो, अर्को पाटो जनतासँग रहने प्रमुख कुरा हो। 

त्यसकारण उहाँहरुले स्थानीय उम्मेदवार उठाउन सक्ने, भोलि पनि जनताको सुखदुख र अप्ठ्यारोमा काम लाग्ने नेता छान्नुपर्छ भन्ने लाग्छ। म त अहिले पनि जनताको सुखदुखमै छु। उहाँहरुसँगै हातेमालो गरिरहेको छु। उहाँहरु मर्दा मलामीदेखि बिरामी हुँदा अस्पतालसम्म र बिहेमा जन्तदेखि सार्वजनिक कार्यक्रममा पुगिरहेको छु। त्यसैले प्रतिस्पर्धी जो भए पनि जित्ने गरी मैले तयारी तीव्रता दिइरहेको छु। 

अहिले घरदैलोमा पुगिरहँदा जनताले कसरी हेरेको पाउनु भएको छ? 
घरदैलोमा पुग्दा मतदाताले नियमित आइदिए हुन्थ्यो भन्ने इच्छा देखाइरहनु भएको छ। एमालेबाट मेरो उम्मेदवारीले उहाँहरु खुसी हुनुभएको पाएको छु। निर्वाचनका बेला हात जोड्दै आउनुहुन्छ, जितेपछि मुख देख्न पाइँदैन भन्ने गुनासो पनि सुनाउनु भयो। तपाईं पनि त्यसो नगर्नु भन्ने प्रतिक्रिया पनि दिइरहनु भएको छ। मैले उहाँहरुलाई आफ्नो कार्ययोजना पनि सुनाएको छु। त्यसो हुँदा युवा उम्मेदवार उठेको भन्दै मतदाताहरु खुसी पाएको छु। मतदाताले देखाउनु भएको माया नै मेरो विजयको हौसला हो भन्ने ठानेको छु। 

२२ उम्मेदवारमध्ये तपाईंलाई नै जनताले मत दिनु पर्ने आधारहरु के छन्?
राम न्यौपाने यहाँको माटोमा हुर्किएको व्यक्ति। यहाँका अनेक अप्ठेरोबाट गुज्रिएर यहाँसम्म आइपुगेको एउटा पात्र हो। एउटा युवा हो। यसकारण मलाई यहाँका समस्या, एजेन्डा र यहाँको जनसम्बन्धबारे राम्रोसँग जानकार छु। यहाँका भौगोलिक आधारमा विकास गर्नुपर्ने पाटोमा निपुण छु। नागरिकको समस्यालाई संसदमा लैजाने र संसदमार्फत राज्यलाई उत्तरदायी बनाउन पहल हुनेछ। यहाँका व्यवसायीदेखि किसान थुप्रै समस्याको चाङमा हुनुहुन्छ। म उहाँको मलहम बन्न सक्नेछु। यिनै आधारमा टेकेर मतदाताहरुले मत दिनुहुन्छ भन्नेमा ढुक्क छु। 

सबै उम्मेदवारलाई जित्ने आत्माविश्वास हुन्छ, तर जित्ने एकजनाले हो। मतपरिणाबारे तपाईंको प्रक्षेपण कस्तो छ? 
त्यो अहिले नै मैले क्याल्कुलेशन गर्न सकेको छैन। तर, हामीले मतदाताको उल्लास हेर्ने हो भने ४० हजारभन्दा बढी मतान्तरले विजयी हुनेमा ढुक्क छु।

तर चितवनका जनता रविको पक्षमा पनि देखिन्छन् नि? 
जनता रास्वपाको पक्षमा छन्, छैनन् भन्ने अहिले नै मुख्य मान्न सकिँदैन। एउटा भ्रमचाहिँ जति चिर्नु पर्ने हो, त्यति चिर्न नसकिएको हो कि भन्ने लागेको छ। पछिल्लो समय मतदाता सचेत भइसकेका छन्। हिजोको जस्तो बाहिरबाट आएर यहाँका जनतालाई भ्रमित बनाउँदै भोट फकाउने अपेक्षासाथ उहाँ (रवि) आउनुभयो। यो पटक पहिले जस्तो उपस्थिति छैन। चितवनबासीले चितवनकै नागरिकलाई  जनप्रतिनिधि बनाउनपर्छ भन्ने बुझिसकेका छन्। आमरुपमा रास्वापाले गरेका गतिविधिको प्रचार धेरै भएकाले नागरिकमा भ्रम परेको मात्रै हो। तर यहाँका स्थानीय अहिले उहाँको पक्षमा उभिनुभएको मैले पाएको छैन।