पछिल्लो २४ घण्टामा देशका पूर्वी जिल्लाका ४ स्थानमा धेरै भारी वर्षा भएको छ।
मौसम पूर्वानुमान महाशाखाले आज (मंगलबार) दिउँसो ३ बजे दिएको तथ्यांकअनुसार सुनसरीका २, झापाको १ र इलामको १ स्थानमा धेरै भारी वर्षा भएको हो।
महाशाखाको विवरणअनुसार पछिल्लो २४ घण्टामा सबैभन्दा धेरै सुनसुरीको चतरामा १६५.४ मिलिमिटर वर्षा भएको छ।
यसपछि झापाको अनारमणि बिर्तामा १४२ मिलिमिटर, सुनसरीको धरान बजारमा ११६.४ मिलिमिटर र इलामको कन्काई मैनाचुलीमा १०६.८ मिलिमिटर वर्षा भएको मौसम महाशाखाको तथ्यांकमा उल्लेख छ।
मौसमविद्का अनुसार २४ घण्टाभित्र सय मिलिमिटरभन्दा माथि, दुई सय मिलिमिटरभन्दा मुनिको वर्षा हुनुलाई धेरै भारी वर्षा भनिन्छ।
उक्त अवधिमा भारी वर्षा त देशका धेरै स्थानमा भएको मौसम महाशाखाले जनाएको छ।
मौसमविद्का अनुसार २४ घण्टाभित्र ५० मिलिमिटरभन्दा माथि १०० मिलिमिटरभन्दा मुनिको वर्षा हुनुलाई भारी वर्षा भनिन्छ।
यसभन्दा सानो वर्षा त देशका अधिकांश स्थानमा भएको महाशाखाले जनाएको छ।
Shares
प्रतिक्रिया