युनिकोड
सञ्चालनमा रहेका वाणिज्य बैंकहरुले ११ महिनामा कर्मचारीमा ५० अर्बभन्दा माथिको रकम खर्च गरेका छन्।
राष्ट्र बैंकका अनुसार आव २०८०/८१ को जेठ मसान्तसम्म २० वाणिज्य बैंकले ५० अर्ब १६ करोड रुपैयाँ कर्मचारीमा खर्च गरेका हुन्।
गत वैशाखसम्म यस्तो खर्च ४५ अर्ब ५४ करोड रुपैयाँ रहेकोमा जेठ महिनामा बैंकहरुको यस्तो खर्च करिब ५ अर्बले बढेको हो।
अघिल्लो आर्थिक वर्ष (२०७९/८०) को असार मसान्तसम्म बैंकहरुले ४७ अर्ब १ करोड रुपैयाँ खर्च गरेकोमा आव २०७८/७९ मा ४७ अर्ब १७ करोड र आव २०७७/७ मा ४२ अर्ब ८२ करोड रुपैयाँ खर्च गरेका हुन्।
बैंकहरुले पछिल्लो तीन वर्षकै सर्वाधिक खर्च कर्मचारीमा गरेका हुन्।
जेठ मसान्तसम्म सबैभन्दा धेरै राष्ट्रिय वाणिज्य बैंकले खर्च गरेको छ। यो बैंकले यो आवको ११ महिनामा कर्मचारीको तलबमा करिब ४ अर्ब रुपैयाँ खर्च गरेको हो।
योबाहेक नेपाल बैंकले ४ अर्ब २७ करोड, नबिल बैंकले ३ अर्ब ४७ करोड, एनआईसी एसियाले ३ अर्ब, कुमारी बैंकले ३ अर्ब ८० करोड, लक्ष्मी सनराइज बैंकले ३ अर्ब १६ करोड, कृषि विकास बैंकले ३ अर्ब ११ करोड रुपैयाँ खर्च गरेको राष्ट्र बैंकले जनाएको छ।
यस्तै ग्लोबल आईएमई बैंकले ३ अर्ब ४२ करोड रुपैयाँ खर्च गर्दा प्रभु बैंकले ३ अर्ब ४० करोड रुपैयाँ कर्मचारीमा खर्च गरेको छ।
योबाहेक एनआईएमबी, हिमालयन, सिद्धार्थ, एनएमबी बैंकले २ अर्बबराबरको खर्च गर्दा सबैभन्दा थोरै स्ट्यान्डर्ड चार्टर्ड बैंकले गरेको छ। सीमित शाखा कार्यालयहरुबाट सेवा दिँदै आएको यो बैंकले जेठ मसान्तसम्म कर्मचारीको तलबमा ९६ करोड रुपैयाँ खर्च गरेको छ।
समग्र बैंक तथा वित्तीय संस्थाहरुले ५६ अर्ब ८३ करोड रुपैयाँमा कर्मचारीको तलब भत्ता लगायतमा खर्च गर्दा वाणिज्य बैंकहरुले मात्रै ५० अर्ब १६ करोड रुपैयाँ खर्च गरेका हुन्।
योबाहेक विकास बैंकले ११ महिनामा ५ अर्ब ३३ करोड र फाइनान्स कम्पनीहरुले ३ करोड रुपैयाँ कर्मचारीको तलब भत्तालगायतमा खर्च गरेका हुन्।
प्रतिक्रिया