फिल्म ‘पूर्ण बहादुरको सारङ्गी’ बन्ने

फिल्म ‘पूर्ण बहादुरको सारङ्गी’ को निर्माण घोषणा भएको छ। सेभेन सिज इन्टरटेनमेन्टले निर्माण गर्न लागेको फिल्मको शुक्रबार मोसन पोस्टर सार्वजनिक गर्दै निर्माण घोषणा गरिएको हो।

सार्वजनिक मोसन पोस्टर मौलिक र कलात्मक छ। पहाडको बाटोसँगै सारङ्गीको मिठो धुन सुनिन्छ। बुढो रुख नजिकै देखिन्छन्, एक व्यक्ति। जसले काँधमा झुण्ड्याएका छन् सारङ्गी। र, उनले बच्चा पनि बोकेका छन्। ती बालकले सोध्छन्- बा तिमी मलाई सधैँ किन काँधमा बोकेर हिड्छौ?

उनले हाँस्दै जवाफ दिन्छन्- म भन्दा ठूलो मान्छे होलास्, मैलेभन्दा परसम्म देख्लास् भनेर। त्यसपछि उनी भावुक हुन्छन्। र, गीत सुरु हुन्छ:

भुईसम्म देख्छु म त

तिमी टेक्नु धुरी

सकेसम्म छेकीदिउँला

घाम अनि हुरी

मोसन पोस्टरले फिल्मले सारङ्गी बजाउँदै हिँड्ने गाइने समुदायको बाध्यता र सन्तानप्रतिको त्यागको कथा भन्ने संकेत गरेको छ। 

नेपाली फिल्मको अन्तर्राष्ट्रिय वितरणमा सक्रिय सेभेन सिज सिनेमाज् को प्रस्तुतिमा बन्ने फिल्म २०८२ सालमा विश्व बजारमा प्रदर्शन गर्ने योजना छ।  

विनोद पौडेल र प्याट्रिक सुवेदीको लगानी रहने यो फिल्मलाई सरोज पौडेलाे लेखन तथा निर्देशन रहनेछ। रमेश चौलागाई र हरि श्रेष्ठ कार्यकारी निर्माता रहेको फिल्ममा महेश दवाडीको पटकथा तथा संवाद, प्रशान्त सिवाकोटीको संगीत छ।