इतिहासका केही घटना बिर्सन सकिँदैन र हुँदैन : प्रदीप ज्ञवाली

नेकपा एमालेका उपमहासचिव प्रदीप ज्ञवालीले इतिहासका केही घटना बिर्सन नसकिने खालका हुने टिप्पणी गरिरहेका छन्। समसामयिक राजनीतिमा अहिले चलिरहेका छलफल सरकार समर्थनको दायरा विस्तार गर्नमात्रै सीमित भएको उनले बताएका छन्। 

सामाजिक सञ्जालमाफर्त ज्ञवालीले भनेका छन्, ‘अहिले चलिरहेको छलफल सरकारको समर्थनको दायरा विस्तार गर्नमा सीमित छ। त्यसभन्दा बाहिर चलेका चर्चा अनुमान, अतिरञ्जना र हल्ला मात्र हुन्।’

पार्टी संकटमा परेका बेलामा सतिसाल झैं उभिएकाहरुको भावना विपरित कुनै निर्णय नहुने उनले बताएका छन्। 

‘पार्टीभित्र र बाहिरबाट सिर्जित भयानक घेराबन्दी तोडेर आन्दोलन यहाँसम्म आइपुगेको हो। सङ्कटका बेला सतिसाल झैं उभिएका कमरेडहरूको भावना विपरित कुनै निर्णय हुनेछैन,’ उनले भनेका छन्, ‘इतिहासका केही घटना यस्ता हुन्छन्, जसलाई बिर्सन सकिँदैन, बिर्सन हुँदैन।’