युनिकोड
सत्ता साझेदार नेकपा (एकीकृत समाजवादी)ले आगामी असोज १४ गतेदेखि २९ गतेसम्म मेची–महाकाली राष्ट्रिय अभियान सुरु गर्ने भएको छ।
मुलुकमा विकसित राष्ट्रिय राजनीतिकाबारे जनतालाई जानकारी गराउने उद्देश्यसहित उक्त अभियान मेचीबाट सुरु गरेर महाकालीमा सम्पन्न गरिने भएको छ।
अभियानका क्रममा समाजवादी अर्थव्यवस्था कार्यान्वयनमा पार्टीले लिएका नीतिगत दृष्टिकोणमा अन्तक्रिया एवं समसामयिक, अन्तर्राष्ट्रिय परिस्थितिबारे देशका मुख्य सहरमा छलफल जनाइएको छ।
पार्टी महासचिव घनश्याम भुसालका अनुसार अभियानका क्रममा जनताबाट प्राप्त सुझावलाई समेटेर पार्टीको संरचना र सामर्थ्य विस्तारका लागि आवश्यक रणनीति, सङ्गठन विस्तार तथा पार्टी आधारभूत तहसम्म स्थापित गर्न आवश्यक कार्ययोजना निर्माण गरिने छ।
उनले अभियानमा राजनीतिक उपलब्धिको रक्षा गरेर मुलुकलाई अग्रगमनतर्फ लैजान तत्कालीन नेकपा (एमाले)सँग विद्रोह गर्नुको औचित्य पुष्टि भएको विषय, जनजीविका, सामाजिक रुपान्तरणका लागि पार्टीका गतिविधि अभियानका क्रममा जनतालाई बुझाइने जानकारी दिए।
जनताको बहुदलीय जनवादको सान्दर्भिकता रहेकाले उक्त विचार छाड्न नहुने र समाजवादी व्यवस्था कार्यान्वयनका लागि जबज छाड्नुपर्ने बहस पार्टीभित्र चलेको छ। यसबारे आगामी महाधिवेशनमार्फत निर्णय गर्ने तयारी छ।
प्रतिक्रिया