रामेछापमा बाढीले पक्की पुल नै बगाउँदा पहिरोमा बेपत्ता भएकाहरुको उद्धारमा समस्या भएको छ।
दोरम्बा-शैलुङ गाउँपालिका २ र ३ जोड्ने पक्की पुल गएराति बाढीले बगाएको जिल्ला प्रहरी कार्यालय रामेछापले जनाएको छ।
दोरम्बा-शैलुङ गाउँपालिका- ३ लेकखर्क पोखरी गाउँका गएराति पहिरोले पाँचवटा घर बगाउँदा धेरैजना बेपत्ता छन्। कति बेपत्ता छन् यकिन भइसकेको छैन।
बेपत्ता भएकामध्ये एक शिशुसहित २ जनाको शव फेला परेको प्रहरीले जनाएको छ।
अहिले घटनास्थलमै रहेका दोरम्बा-शैलुङ गाउँपालिकाका अध्यक्ष मैनकुमार मोक्तानले पनि बेपत्ताहरुको संख्या यकिन गर्न बाँकी रहेको बताए।
‘एउटै गाउँमा दुई ठाउँमा पहिरो जाँदा पाँच घरमा क्षति पुगेको छ,’ उनले नेपालखबरसँग भने, ‘कोही पाँच घरमा गरेर १० जना बेपत्ता भए भन्छन्, कोही ८ जना भन्छन्। यकिन गर्न सकिएकाे छैन।’
उनले बाढी पहिरोले वडा नम्बर २ बाट ३ को टोकरपुर जाने ढोइ गाउँ खोलाको पक्की पुल बगाउँदा सुरक्षाकर्मीलाई घटनास्थलमा जानसमेत समस्या भएको बताए।
Shares
प्रतिक्रिया