कार्यवाहक राष्ट्रपति रामसहायप्रसाद यादवले आयुर्वेदलाई प्राथमिकतामा राखेर बजेट विनियोजन गर्नुपर्ने बताएका छन्।
देशको आर्थिक क्षेत्रमा समेत टेवा पुर्याउन आयुर्वेदलाई प्राथमिकतामा राखेर बजेट विनियोजन गर्नुपर्ने उनको भनाई थियो।
आईतबार काठमाडौंमा आयोजित प्रथम राष्ट्रिय आयुर्वेद एचिभमेन्ट अवार्ड समारोहलाई सम्बोधन गर्दै कार्यबहाक राष्ट्रपति यादवले आयुर्वेदको समय अनुकूल स्वास्थ्य नीति एवम् कार्यक्रम तर्जु गर्न र स्वास्थ्य विमामा आयुर्वेद सेवालाई समावेश गर्ने कार्यमा लाग्न पनि सम्वद्ध सबै पक्षलाई आग्रह गरे।
उनले आयुर्वेद चिकित्सक एवम् स्वास्थ्यकर्मीहरुको वृत्तिविकास, अवसर सिर्जना गर्न सम्वद्ध सबै लाग्ने विश्वास समेत व्यक्त गरे। कार्यबहाक राष्ट्रपति यादवले नेपालमा आधाभन्दा बढि आयुर्वेद औषधि आयात गर्नुपर्ने अवस्था रहनु बिडम्बनापूर्ण रहेको उल्लेख गर्दै त्यसलाई अन्त्य गर्नका लागि स्थानीय जडिबुटी एवम् स्रोत, साधनहरुको अधिकतम प्रयोग हुने गरी लगानी र उत्पादनमा वृद्धि गर्न जरुरी रहेको बताए।
उनले भने, ‘आयुर्वेदको समय अनुकूल स्वास्थ्य नीति एवम् कार्यक्रम तर्जुमा, बजेट विनियोजनमा आयुर्वेदलाई प्राथमिकतामा राख्ने, विशेषज्ञ आयुर्वेद सेवा प्रदान गर्ने, आधुनिक अस्पतालहरु प्रदेश स्तरमा स्थापना गर्न, स्वास्थ्य विमामा आयुर्वेद सेवालाई समावेश गर्न, आयुर्वेद चिकित्सक एवम् स्वास्थ्यकर्मीहरुको वृत्तिविकास, अवसर सृजना गर्न र शिक्षण संस्थाहरुको अध्ययन, अध्यापनलाई वैज्ञानिक तथा अनुसन्धानमूलक बनाउन सम्वद्ध सबै लाग्नु हुनेछ भन्ने विश्वास लिएको छु।’
कार्यवाहक राष्ट्रपति यादवले नेपाललाई मेडिकल टुरिजमको रुपमा विकास गर्ने सम्भावना उच्च रहेको पनि बताए। त्यसका लागि आयुर्वेद क्षेत्रमा लगानी र उत्पादन बढाउन सम्वद्ध सबै पक्षले जोड दिनुपर्ने उनको भनाई थियो।
Shares
प्रतिक्रिया