समाजवादी मोर्चाबारे बालुवाटारमा जारी छलफलमा बाबुराम र वामदेव गएनन्

यसै साता समाजवादी मोर्चा घोषणा गर्ने तयारीमा रहेका दलहरूले आपसी संवादलाई तीव्रता दिएका छन्। 

यसै क्रममा अहिले प्रधानमन्त्रीको सरकारी निवास (बालुवाटार) मा प्रधानमन्त्रीसमेत रहेका माओवादी केन्द्रका अध्यक्ष प्रचण्डसहित चार दलका शीर्ष नेताबीच छलफल भइरहेको छ। 

छलफलमा माओवादी केन्द्रबाट अध्यक्ष प्रचण्ड, वरिष्ठ उपाध्यक्ष नारायणकाजी श्रेष्ठ र महासचिव देव गुरुङ छन् भने नेकपा एकीकृत समाजवादीबाट अध्यक्ष माधवकुमार नेपाल, जसपाबाट अध्यक्ष उपेन्द्र यादव र नेकपाबाट महासचिव विप्लव सहभागी छन्।

• समाजवादी मोर्चा घोषणाको तयारीमा रहेका ४ दलका शीर्ष नेताबीच बालुवाटारमा छलफल

तर समाजवादी मोर्चामा सहभागी हुने भनिएका ६ दलमध्ये डा. बाबुराम भट्टराई र वामदेव गौतमका पार्टी भने बालुवाटारमा अहिले जारी छलफलमा सहभागी भएको छैन। 

• ६ दलको समाजवादी मोर्चा यसैसाता घोषणा हुने, स्थानीय तहसम्म संयन्त्र

बालुवाटारमा एक घण्टाअघि देखि जारी छलफलमा नेपाल समाजवादी पार्टीका अध्यक्ष डा. बाबुराम भट्टराई र राष्ट्रिय एकता अभियानका संयोजक वामदेव गौतम भने पुगिनसकेको बालुवाटार स्रोतले नेपालखबरलाई जानकारी दियो। 

‘प्रधानमन्त्रीसमेत चार दलका शीर्ष नेताहरूबीच समाजवादी मोर्चा घोषणाबारे छलफल भइरहेको छ’, स्रोतले भन्यो, ‘तर अहिलेसम्म डा.बाबुराम भट्टराई र वामदेव गौतम आइसक्नु भएको छैन।’ 

यसै साता घोषणको तयारी गरिएको समाजवादी मोर्चामा बाबुराम र वामदेवलाई पनि समेट्ने बताइएको छ। तर उनीहरूको अनुपस्थितिले अन्योल सिर्जना गरेको छ।