विमान दुर्घटनाबारे गहन अध्ययन गरेर दोषीलाई कारबाही गर्न एकीकृत समाजवादीको माग

नेकपा (एकीकृत समाजवादी) ले सौर्य एयरलाइन्सको विमान दुर्घटनाबारे गहन रुपमा अध्ययन गर्न सरकारसँग आग्रह गरेको छ।

बिहीबार पार्टी केन्द्रीय कार्यालय आलोनगरमा बसेको एकीकृत समाजवादीको केन्द्रीय कमिटीको बैठकले  सौर्य एयरलाइन्स दुर्घटनाबारे गहन रुपमा अध्ययन गर्न सरकासँग आग्रह गर्ने निर्णय गरेको प्रचार विभाग प्रमुख जगन्नाथ खतिवडाले जानकारी दिए।

दुर्घटनाका दोषीमाथि कारबाही हुनुपर्ने र मृतकका परिवारलाई उचित क्षतिपूर्ति दिनुपर्ने माग समेत एकीकृत समाजवादीले गरेको छ। बैठकबारे जानकारी दिँदै उनले भने, ‘सौर्य एयरलाइन्सको दुर्घटनाबारे मृतकप्रति श्रद्धाञ्जली दिँदै र दुर्घटनाको बारेमा प्राविधिक पक्ष के थियो? त्यसको छानबिन तत्काल गर्न र उपयुक्त समाधान निकाल्नुपर्ने। मृतक परिवारलाई उचित क्षतिपूर्ति दिनुपर्ने।’

बैठकमा २९९ सदस्यीय केन्द्रीय समितिलाई पूर्णता दिनेबारे समेत छलफल भएको बताइएको छ।