महोत्तरीको बर्दिबासस्थित खानेपानी तथा सरसफाइ उपभोक्ता संस्थाको नयाँ कार्यसमिति चयनका लागि आज मतदान भएको छ। आइतबार बिहान ८ बजेदेखि सुरु भएको हो।
संस्थाको अध्यक्षमा पाँच जनाले उम्मेदवारी दिएका छन्। विभिन्न राजनीतिक दलका नेतारकार्यकर्ताले दलगत रुपमा प्यानलै बनाएर उम्मेदवारी दिएका छन्।
संस्थाका पूर्वअध्यक्षसमेत रहेका चूडामणि पोखरेलले पनि आफ्नो प्यानलतसहित अध्यक्षमा उम्मेदवारी दिएका छन्। उनी माओवादी केन्द्र निकट मानिन्छन्। उनले एमाले र कांग्रेसलाई पनि समेटेर आफ्नो प्यानल खडा गरेका छन्।
एमालेबाट अध्यक्ष पदका लागि तीनजनाले उम्मेदवारी दिएका छन्। एमालेबाट निरोज अधिकारी, देवनारायण महतो र भोजराज भट्टराईले अध्यक्ष पदका लागि उम्मेदवारी दिएका हुन्। एमालेमा अध्यक्ष पदका लागि सर्वसम्मत उम्मेदवार नभएपछि तीन जनाको उम्मेदवारी परेको हो।
बर्दिबास नगरपालिकाका मेयर प्रह्लादकुमार क्षेत्रीनिकट मानिने भुलनबहादुर सेन ठकुरीले पनि प्यानलसहित उम्मेदवारी दिएका छन्। कांग्रेस निकटका ठकुरी गएको स्थानीय तहको निर्वाचनमा स्वतन्त्र उम्मेदवार क्षेत्रीको पक्षमा लागेका थिए।
बर्दिबास खानेपानी संस्थाको कार्यसमिति अध्यक्ष, उपाध्यक्ष, सचिव, कोषाध्यक्ष र पाँच जना सदस्यसहित ९ सदस्यीय छ।
संस्थाको उपाध्यक्षमा चार, सचिवमा चार, कोषाध्यक्षमा ६ र पाँच जना सदस्यको लागि १९ जनाबीच प्रतिस्पर्धा हुने प्रमुख निर्वाचन अधिकृत सन्देश अधिकारीले जानकारी दिए।
बर्दिबास खानेपानी संस्थाको हरेक निर्वाचनमा दलहरुले प्यानल बनाएर उम्मेदवार उठाउने गरेका छन्। खानेपानी तथा सरसफाइ उपभोक्ता समिति बर्दिबासमा पाँच हजार तीन सय ३० जना मतदाता छन्।
अहिलेसम्म ३१ सयभन्दा धेरै मत खसेको निर्वाचन अधिकृतको कार्यालयले जनाएको छ। मतदान साँझ पाँच बजेसम्म जारी रहने छ।
आर्थिक रुपमा निकै बलियो बर्दिबास खानेपानीको नेतृत्वमा पुग्न विभिन्न राजनीतिक दलका नेताहरुबीच तीव्र प्रतिस्पर्धा हुने गरेको छ।
मतदान स्थलमा मोबाइल लैजान निषेध गरिएको छ।
Shares
प्रतिक्रिया