बैतडीमा एक बालिकालाई जबरजस्ती करणीको आरोपमा दुई जना पक्राउ परेका छन्। जिल्लाको सुर्नया गाउँपालिका-८ का ३१ वर्षीय अर्जुन साउद र कैलालीको गोदावरी नगरपालिका-२ का ३० वर्षीय वासुदेव पन्तलाई प्रहरीले पक्राउ गरेको हो।
वासुदेवको सहयोगमा अर्जुनले जिल्लाको पुर्चौडी नगरपालिकाकी १३ वर्षीया बालिकालाई जबरजस्ती करणी गरेको प्रहरीको आरोप छ।
शुक्रबार इलाका प्रहरी कार्यालय पाटन पुगेर बालिकाकी आमासहित आफन्तले जबरजस्ती करणीको जाहेरी दिएका इलाका प्रहरी कार्यालय पाटनका प्रहरी निरीक्षक गौरीप्रसाद जैसीले जानकारी दिए।
जाहेरीपछि प्रारम्भिक अनुसन्धान सुरु गरिएको बैतडीका प्रहरी प्रमुख प्रहरी नायब उपरीक्षक नारायणप्रसाद अधिकारीले बताए। घटनामा सङ्लग्न दुबैलाई थप अनुसन्धानका लागि जिल्ला अदालतबाट शुक्रबार नै पाँच दिन म्याद थप गरिएको छ। पीडित बालिका आमासँग घर फर्किएकी छन्।
यसअघि भदौ २४ गते पनि बैतडीकै सिगास गाउँपालिकाकी १७ वर्षीया किशोरी बलात्कारको आरोपमा प्रहरीले शिक्षक, कर्मचारीसहित पाँच जनालाई नियन्त्रणमा लिएर अनुसन्धान गरिरहेको छ।
Shares
प्रतिक्रिया