‘अवतार’सँग डरायो सरिताको ‘सरी मम’

कलाकार सरिता लामिछाने अभिनित फिल्म ‘सरी मम’को प्रदर्शन मिति सरेको छ। मंसिर २९ गतेदेखि प्रदर्शन गर्ने भनिएको यो फिल्मको प्रदर्शन मिति यसको २ दिनअघि मात्रै सारिएको हो। अब यो फिल्म माघ ५ गते प्रदर्शन हुने भनिएको छ।

हलिउड फिल्म ‘अवतार’ यही मिति (मंसिर २९ गते) मा आएकाले आफ्नो फिल्म सारेको निर्माता विनोद लामाले बताएका छन्। एनएफआई क्रियशनको ब्यानरमा निर्माण भएको फिल्मले लागुऔषध दुर्व्यसनीको कथा भन्ने छ।

फिल्मको ट्रेलरमा पनि कुलतमा परेका एक किशोर र त्यसले उनको परिवार र जीवनमा ल्याएको उतारचढावको कथा छ। नवीन बोगटीले निर्देशन गरेको यो फिल्ममा सरिताका साथमा सरोज खनाल, एलिस राई, प्रभात पल, प्रेविल कँडेल, आरबी कटुवाल, बिहान श्रेष्ठलगायत कलाकारले अभिनय गरेका छन्।