संघीय राजधानी काठमाडौँबाट बागमती प्रदेशको राजधानी हेटौँडालाई जोड्ने छोटो दूरीको हेटौँडा-भीमफेदी-कुलेखानी-काठमाडौँ सडकमा सवारी साधनको चाप बढेको छ।
बीपी राजमार्ग र कान्ति लोकपथ बाढी पहिरोको कारण बन्द हुँदा अहिले काठमाडौँ हेटौँडा जोड्ने छोटा दूरीका दुई राजमार्गमा सवारी साधनको चाप अत्यधिक छ।
यतिबेला हेटौँडा-काठमाडौँ आवतजावत गर्न त्रिभुवन राजपथ अन्तर्गत पर्ने हेटौँडा-भैँसे पालुङ-चन्द्रागिरि सडक र फर्पिङ, कुलेखानी, भीमफेदी हेटौँडा सडक मात्रै सञ्चालनमा छन्।
बीपी राजमार्ग अझै अवरुद्ध अवस्थाममा रहेको कारण ओखलढुंगा, खोटाङ, सोलुखुम्बु, भोजपुर जस्ता पूर्वी पहाडी जिल्लामा जाने सबैजसो साना सवारी साधन पनि यतिबेला यिनै दुई सडक भएर गुडिरहेका छन्।
यही असोज १० र ११ गते भएको अविरल वर्षापछिको बाढीपहिरोले हेटौँडा-भीमफेदी-कुलेखानी-काठमाडौँ सडक पनि एक सातासम्म बन्द थियो। पुल बगाएको कुलेखानीमा डाइभर्सन गरेपछि आइतबार साँझबाट यो सडकमा गाडी गुड्न थालेका हुन्।
तर, यो सडकको सयौँ ठाउँमा अझै पहिरो पूर्ण रूपमा हटाइएको छैन। जसको कारण दुईतर्फी सवारी सञ्चालनमा समस्या छ। सवारी साधन घण्टौँ जाममा फस्ने गरेका छन्। सवारी साधनको जाम फर्पिङदेखि कुलेखानीसम्म नै छ।
फाखेल, हुमाने, कुलेखानीसहितका ठाउँमा सयौँ अवरोध छ। मुस्किलले एटा गाडी मात्रै गुड्न मिल्ने गरेर पहिरो पन्छाइएको छ। दर्जनौँ ठाउँमा लेदोसहितको दह र खहरेको अवरोध छ।
कुलेखानीको ड्याममुनि बाढीले बगाएको पुलको ठाउँमा बनाइएको डाइभर्सनमा पनि घण्टौँ सवारी साधन फस्ने गरेका छन्।
Shares
प्रतिक्रिया